Ikipe ya APR FC na Kiyovu Sports kuri uyu wa Gatandatu zombi zananiwe kubona amanota atatu, ziha Rayon Sports bahanganiye igikombe cya shampiyona amahirwe yo kongera kuzotsa igitutu.
APR FC yari yakiriye AS Kigali kuri Stade ya Bugesera, mu mukino w’umunsi wa 27 wa shampiyona wabereye kuri Stade ya Bugesera.
Ni umukino byari byitezwe ko uza kugora iyi kipe y’Ingabo z’Igihugu, dore ko iheruka gutsinda AS Kigali mu minsi 1578 ishize.
AS Kigali yafunguye amazamu ku munota wa 31 w’umukino kuri penaliti Shaban Hussein yateye umunyezamu Ishimwe Pierre ayikuramo, gusa birangira uyu rutahizamu w’Umurundi asonze umupira mu izamu.
Byari nyuma y’ikosa myugariro Nshimiyimana Yunusu yari akoreye kuri rutahizamu Jacques Tuyisenge.
Byasabye iminota 10 ngo APR FC yishyure iki gitego ibifashijwemo na Penaliti ya Ombolenga Fitina; nyuma y’uko Kwitonda Alain ‘Bacca’ yari amaze gutegerwa mu rubuga rw’amahina na ba myugariro ba AS Kigali.
Iminota yakurikiyeyo yaranzwe no kugerageza gusatirana ku mpande zombi kutagize uburyo bugaragara kwigeze gutanga.
Kunganya uyu mukino byatumye APR FC yuzuza imikino ine ya shampiyona yikurikiranya idatsinda, amahirwe yayo yo kwegukana igikombe cya shampiyona akomeza kuyoyoka.
Umunsi wa 27 wa shampiyona usize iyi kipe y’umutoza Ben Moussa ku mwanya wa kabiri n’amanota 54, irushwa atatu na Kiyovu Sports na yo yatsikiye imbere ya Mukura VS baguye miswi 0-0.
APR FC ishobora gutakaza umwanya wa kabiri kuri iki Cyumweru mu gihe Rayon Sports irusha amanota abiri yaba itsinze Espoir FC izasura i Rusizi.
