Ikipe ya Rayon Sports yageze ku mukino wa nyuma w’Igikombe cy’Amahoro nyuma yo gusezerera Mukura VS ku giteranyo cy’ibitego 4-3.
Iyi kipe ikunzwe kurusha izindi mu Rwanda yari yakiriye Mukura VS kuri Kigali Pele Stadium, mu mukino wo kwishyura wa ½ cy’irangiza warangiye amakipe yombi aguye miswi igitego 1-1.
Ni nyuma y’ubanza wabereye i Huye ku wa Gatatu w’iki cyumweru warangiye itsinze ibitego 3-2.
Umunya-Caméroun Essomba Willy Onana ni we wafunguriye amazamu Rayon Sports ku gitego cyo ku munota wa 61 w’umukino, ku mupira yari ahawe n’Umugande Joackiam Ojera mbere yo kurekura ishoti riremereye ryaruhukiye mu izamu ry’umunyezamu Nicolas Ssebwato.
Byasabye umunota wa 90+4 ngo Mukura VS yishyure ibifashijwemo na Nshimiyimana Emmanuel.
Rayon Sports nyuma yo gusezerera Mukura izahurira ku mukino wa nyuma w’Igikombe cy’Amahoro n’ikipe izarokoka hagati ya APR FC na Kiyovu Sports zigomba kwisobanura kuri iki Cyumweru.
Aya makipe yombi yaguye miswi igitego 1-1 mu mukino ubanza wa ½ cy’irangiza uheruka kubera kuri Stade ya Bugesera.
