Abayobozi babishinzwe baravuga ko igeragezwa ry’urukingo rwa virusi itera SIDA mu Rwanda, ryatangiye kuva mu 2021, ryerekanye iterambere ryiza mu byiciro byaryo bya mbere .
Ku nkunga ya International Vaccine Initiative (IAVI), umuryango mpuzamahanga udaharanira inyungu, igeragezwa ririmo gukorerwa mu bihugu bibiri bya Afurika, u Rwanda na Afurika y’Epfo.
Igeragezwa rigamije gusuzuma imikorere ya eOD-GT8 60mer, umuti ikingira virus ya VIH wakozwe n’itsinda ry’abahanga muri IAVI na Scripps Research, watanzwe binyuze muri Moderna.
Iri gerageza rizwi ku izina rya IAVI G003, mu Rwanda no muri Afurika y’Epfo rishingiye ku iterambere ryakozwe mbere mu bushakashatsi bw’inkingo za virusi itera sida, harimo n’ibyavuye mu igerageza rya mbere ryiswe IAVI G001 ryakorewe muri Amerika. IAVI G001 yerekanye igabanuka ry’ibyago byo kwandura ku bantu 97% bakuze bafite ubuzima bwiza bakoreweho igeragezwa muri Amerika.
IAVI G003 irashaka gusuzuma niba eOD-GT8 60mer ishobora gutanga ubudahangarwa bw’umubiri mu baturage ba Afurika nkuko bigaragara muri IAVI G001.
Umuyobozi mukuru ushinzwe itumanaho muri IAVI, Karie Youngdahl, yatangaje ko hari intambwe imaze guterwa mu cyiciro cya mbere cy’igerageza kandi agaragaza ko afitiye icyizere icyerekezo cyabo.
Ati “Inkingo zose zatanzwe muri iri gerageza, kandi gukurikirana abemeye kugeragerezwaho no gusesengura amakuru birakomeje. Bitewe n’imiterere igoye y’uburyo bwo gukingira bwakozwe na IAVI n’abafatanyabikorwa, turateganya kuzakora ibizamini byinshi byo mu cyiciro cya mbere mu gihe tunonosora ibyo twizera ko bizaba amabwiriza agenga imikoreshereze y’urukingo “.
Yakomeje agira ati “Twizeye ko igerageza rya IAVI G003 Icyiciro cya mbere riri mu nzira zitanga icyizere. Mu ntangiriro z’uyu mwaka, twerekanye isesengura ry’agateganyo mu igerageza risa nk’iryakorewe muri Leta Zunze Ubumwe za Amerika mu nama z’ubumenyi ndetse n’ihuriro rya Moderna. Ibisubizo by’ibanze bivuye mu itangwa ry’urukingo nk’uru rwakoreshejwe muri IAVI G003 byerekana ko umukandida w’urukingo, iyo rutanzwe binyuze muri mRNA ( messenger ribonucleic acid), atanga ibisubizo by’ubudahangarwa bingana cyangwa bikomeye kurusha ibyatanzwe hakoreshejwe poroteyine mu igerageza ryabanje muri Amerika rizwi ku izina rya IAVI G001 “.
Igerageza rya IAVI G003 rigamije kwandika abakorerabushake 18 bafite ubuzima bwiza, batanduye virusi itera SIDA ahantu hatandukanye hageragerezwa urukingo.
Buri wese mu bitabiriye ahabwa doze ebyiri za eOD-GT8 60mer, ikubiyemo igice cy’urukurikirane rwa virusi kandi idashobora gutera virusi itera sida.
Abitabiriye igerageza bakurikiranwa mu gihe cy’amezi atandatu nyuma yo kubona doze ya nyuma, kandi ibisubizo by’ubudahangarwa bwabo birasesengurwa cyane kugirango harebwe ibyagezweho mu byari byitezwe.
