Itsinda rigari ry’abantu baturutse mu ngabo z’ibihugu bigize umuryango wa Afurika y’iburasirazuba (EACRF), abo muri misiyo y’amahoro y’Umuryango w’Abibumbye muri Repubulika ya demukarasi ya Congo n’izindi nzego z’akarere zihuriweho, ryatangiye gusura ikigo cya gisirikare cya Rumangabo cyatijwe abarwanyi b’umutwe witwaje intwaro wa M23.
Iri tsinda ryakiriwe n’ingabo za Kenya zigenzura iki kigo, ziyobowe na Colonel Daniel Rotich kuri uyu wa 22 Kamena 2023, ziritembereza muri iki kigo cyose.
Abari barigize barimo Komanda wa EACRF, Maj. Gen. Alphaxard Muthuri Kiugu, Maj. Gen. Emmanuel Kaputa umwungirije, Komanda wungirije w’ingabo za MONUSCO, Maj. Gen. Benoit Chavanat, Lt Gen. Joà£o Massone uyobora urwego rw’akarere k’ibiyaga bigari na EAC ruhuriweho, n’abandi bofisiye babaherekeje.
Uru ruzinduko rwabaye nk’uko byemejwe n’abakuru b’ibihugu bya EAC mu nama yigaga ku mutekano wa RDC yabahurije i Bujumbura mu Burundi tariki ya 31 Gicurasi 2023.
Aba bakuru b’ibihugu banzuye ko abarwanyi ba M23, aho kujya muri zone ya Sabyinyo nk’uko byari byaranzuwe mbere, bazajya muri iki kigo cya gisirikare mu gihe kizaba cyaramaze gutegurwa, mbere yo kujyanwa muri Kindu mu ntara ya Maniema, aho byateganyijwe ko bazasubirizwa mu buzima busanzwe.
M23 yaciye amarenga ko itazemera kujya muri iki kigo yigeze kwambura ingabo za Leta, cyane ko ngo ari icyemezo yafatiwe itabanje gutegwa amatwi. Yari yasabye umuhuza wa Leta ya RDC n’imitwe yitwaje intwaro bihanganye, Uhuru Kenyatta, kubanza kumva uruhande rwayo.
Uhuru ariko yari yarasabwe n’abakuru bibihugu kujya avugana n’abayobozi ba M23, akabamenyesha aho gahunda igeze. Ntabwo bizwi niba bari bavugana kuva inama ya Bujumbura yaba.
