Kuri uyu wa Kabiri, itariki 27 Kamena, komisiyo ishinzwe amatora muri Sierra Leone, yatangaje ko Perezida Julius Maada Bio, uri ku butegetsi kuva mu 2018, yatsindiye manda ya kabiri ku majwi arenga 56% .
Komiseri mukuru wa Komisiyo y’Amatora, Mohamed Kenewui Konneh, yabwiye abanyamakuru mu murwa mukuru Freetown ati: “Nshingiye ku bubasha nahawe, ndemeza ko Julius Maada Bio yatorewe kuba perezida mu matora yo ku ya 24 Kamena 2023”.
Bio, w’imyaka 59, umuyobozi w’Ishyaka ry’Abaturage rya Sierra Leone (SLPP), yatsinze amatora ku majwi 56.17% mu cyiciro cya mbere nk’uko tubikesha Anadolu Agency.
Uwo bahanganye begeranye cyane mu majwi, Samura Kamara, wo mu ishyaka All Peoples’ Congress (APC), yaje ku mwanya wa kabiri n’amajwi 41.16%.
Komisiyo y’amatora ivuga ko n’abaturage barenga miliyoni 8 n’abatora biyandikishije bagera kuri miliyoni 3, abitabiriye amatora mu gihugu barenga miliyoni 2.8, bangana na 83% by’abatoye bose biyandikishije.
