Amakuru akomeje kujya hanze ku byerekeye igura n’igurisha mu makipe akina muri shampiyona y’u Rwanda, aravuga ko ikipe ya Rayon Sports igiye kugarura umukinnyi w’umunya Maroc wayikinnyemo igihe gito ariko akaza kuyivamo.
Uyu mukinnyi witwa Youssef Rharb byatangajwe ko agiye gusubira muri iyi kipe mu gihe yari yayivuyemo ayishinja kuba imufata nabi mu buryo butandukanye burimo no kudahembwa.Bivugwa ko Youssef Rharb w’imyaka 22 y’amavuko, yasinye amasezerano y’umwaka umwe.Umunyamabanga wa Rayon Sports Patrick Namenye, nawe yashimangiye iby’aya makuru abinyujije ku mbuga nkoranyambaga avuga ko ari ukuri.
Youssef Rharb na mugenzi we Ayoub baje muri Rayon Sports nk’intizanyo za Raja Casablanca, mu mwaka w’imikino wa 2021-2022, ariko ntiyawusoza kuko mu ijoro ryo ku wa 17 Mutarama 2022, baje gusubira iwabo bavuga ko bamaze amezi abiri badazi umushahara.
Mu gihe kitarenze icyumweru ngo uyu musore araba asesekaye ku butaka bw’u Rwanda aho azaba aje gutangira gukinirira iyi kipe muri ishampiyona y’umwaka utaha.
