Perezida Andry Rajoelina wa Madagascar yatangaje ko yanyuzwe n’uburyo yakiriwe mu Rwanda, mbere yo guhura na mugenzi we Paul Kagame w’u Rwanda.
Ku Cyumweru tariki ya 06 Kanama ni bwo Perezida Rajoelina yageze mu Rwanda, mu ruzinduko rw’akazi.
Ni uruzinduko yatumiwemo na Perezida wa Repubulika, Paul Kagame.
Perezida Rajoelina akigera i Kigali yakiriwe na Minisitiri w’Ububanyi n’Amahanga, Dr Vincent Biruta, mbere y’uko aba bombi bagirana ibiganiro.
Umukuru w’Igihugu cya Madagascar abinyujije ku rubuga rwe rwa Twitter, yashimiye Minisitiri Biruta ku bwo kumwakira neza.
Ati: “Wakoze Minisitiri Vincent Biruta ku bwo kunyakira mu buryo budasanzwe i Kigali kuri uyu mugoroba. U Rwanda ni icyitegererezo ku iterambere rya Afurika.”
Perezida Rajoelina yunzemo ko kuri uyu wa Mbere ari bwakirwe na Perezida Paul Kagame bakagirana ibiganiro bigamije “gushimangira ubufatanye n’ubucuti hagati ya Madagascar n’u Rwanda.”
