Kuri iki Cyumweru gishize, byibuze abantu 14 biciwe mu Ntara ya Ituri mu burasirazuba bwa Congo, nyuma y’uko umutwe witwara gisirikare ugabiye igitero ku bantu bari barimo gusenga mu rusengero, nk’uko umuyobozi waho ndetse n’umuyobozi wa sosiyete sivile babitangaje kuri uyu wa Mbere.
Umuyobozi wa Teritwari ya Djugu, Ruphin Mapela n’umuyobozi wa sosiyete sivile, Dieudonne Lossa, batangaje ko umutwe wa CODECO ari wo uri inyuma y’iki gitero.
Lossa yagize ati: “Abahohotewe basengaga Uwiteka, ariko ikibabaje ni uko inyeshyamba zamenyekanye nka CODECO zabarashe.”
Aba bayobozi bombi bavuze ko abasivili 9, inyeshyamba 4 n’umusirikare bishwe nk’uko iyi nkuru yatangajwe na Reuters ikomeza ivuga.
Mapela yavuze ko inyeshyamba zateye insengero za Mesa, Cepac na Aumopro ziherereye hafi y’inkombe z’ikiyaga cya Albert muri Sheferi ya Bahema-Nord.
Umuvugizi w’ingabo muri Ituri, Jules Ngongo Tshikudi yagize ati: “Turahamagarira abaturage gukomeza gutuza mu gihe ingabo zikurikirana abo bagizi ba nabi kugira ngo zibahagarike.”
CODECO ivuga ko irengera inyungu z’abahinzi bo mu bwoko bw’aba Lendu, umaze igihe kinini mu makimbirane n’aborozi b’Aba-Hema.
