Abacancuro b’abanya-Roumanie boherejwe muri Repubulika Iharanira Demokarasi ya Congo, baravugwa mu bwicanyi buheruka gukorerwa mu mujyi wa Goma.
Ni ubwicanyi bwabaye ku wa Gatatu tariki ya 30 Kanama 2023.
Leta ya Congo Kinshasa yemera ko hari abaturage 43 baguye muri iriya myigaragambyo, na ho ababarirwa muri 56 bayikomerekeramo.
Imibare y’abaguye muri iyi myigaragambyo cyakora ntivugwaho rumwe, kuko abayiguyemo bivugwa ko barenga 100.
Amatsinda y’Abaturage yo mu ntara ya Kivu y’Amajyaruguru kuri ubu barasaba ko abacancuro b’abanya-Roumanie bari i Goma batabwa muri yombi, nyuma yo kugira uruhare muri buriya bwicanyi.
Aba bacancuro baravugwa mu rupfu rw’abasivile batandatu bari mu bamaganaga Ingabo za MONUSCO ziri muri RDC basaba ko zasubira iwabo.
