Ikigo cy’Igihugu cy’iteganyagihe kiremeza ko kuva taliki ya 1 kugeza kuya 10 Ukwakira 2023, mu Rwanda hateganyijwe imvura iri hagati ya milimetero 0 na 75 ikazaba iri hasi y’ ikigero cy’impuzandengo y’imvura isanzwe igwa mu gihugu mu gice cya mbere cy’Ukwakira.
Imvura iteganyijwe izajya igwa ahantu hamwe na hamwe ntigere hose icyarimwe naho iminsi iteganyijwe kugwamo imvura ikazatandukana bitewe nahantu. Muri rusange, iminsi iteganyijwe kugwamo imvura izaba iri hagati y’umunsi umwe (1) n’iminsi itanu (5), naho amataliki iteganyijwemo akaba ari taliki ya 2 no kuva taliki ya 7 kugeza mu mpera ziki gice.
Imvura iteganyijwe izaba irimo inkuba ikazaterwa n’isangano ry’imiyaga riherereye mu majyaruguru y’akarere u Rwanda ruherereyemo rimanuka risatira u Rwanda, rikoongerera imbaraga imvura ituruka ku miterere ya buri hantu nk’imisozi miremire n’amashyamba.
Uko imvura itaganyijwe ahantu hatandukanye: Imvura iri hagati ya milimetero 0 na 75 iteganyijwe henshi mu Gihugu. Imvura iri hagati ya milimetero 60 na 75 niyo nyinshi iteganyijwe mu bice byinshi mu turere twa Rutsiro, Nyamasheke, uburengerazuba bw’Akarere ka Ngororero, amajyarguru y’Akarere ka Karongi, Rusizi na Nyabihu, Amajyepfo y’Akarere ka Rubavu no mu bice bike by’Akarere ka Gakenke.
Imvura iri hagati ya milimetero 45 na 60 iteganyijwe mu bice bisigaye by’Intara y’Amajyaruguru na mu Burengerazuba ndetse no mu Karere ka Nyamagabe. Imvura iri hagati ya milimetero 30 na 45 iteganyijwe henshi mu Turere twa Nyamagabe, Gicumbi, uburengerazuba bw’Uturere twa Nyaruguru, Ruhango Nyanza, Muhanga, Gakenke, Nyagatare na Gatsibo, iburasirazuba bw’Akarere ka Gicumbi, amajyepfo y’Akarere ka Rulindo, Gakenke na Nyabihu.
Imvura iri hagati ya milimetero 15 na 30 iteganyijwe henshi mu Mujyi wa Kigali, mu Turere Nyaruguru, Huye, Nyanza, Ruhango, Muhanga, Kamonyi, Rwamagana, Ngoma, Gatsibo na Nyagatare ndetse no mu burengerazuba bw’Uturere twa Kirehe na Kayonza. Imvura iri munsi ya milimetero 15 niyo nkeya iteganyijwe muri iki gice ikaba iteganyijwe mu bice by’Amayaga, Bugesera, Kayonza na Kirehe ndetse no mu burasirazuba bw’Uturere twa Nyagatare na Gatsibo.
Umuyaga uteganyijwe : Nkuko bigaragara ku ikarita yerekana umuvuduko w’umuyaga, mu gice cya mbere cy’ukwezi k’Ukwakira 2023, hateganyijwe umuyaga uri hagati ya metero 4 na metero 10 urenzeho ku isegonda. Umuyaga uringaniye ufite umuvuduko uri hagati ya metero 4 na 6 ku isegonda (reba ibara ry’icyatsi kibisi) uteganyijwe mu Mujyi wa Kigali, uburasirazuba bw’Akare ka Kamonyi, amajyepfo y’Uturere twa Rulindo na Gicumbi ndetse n’amajyaruguru y’Akarere ka Gakenke.
Umuyaga uringaniye ushobora kuba mwinshi ufite umuvuduko uri hagati ya metero 6 na 8 ku isegonda (ibara ry’umuhondo) uteganyijwe henshi mu Gihugu usibye mu Ntara y’Uburengerazuba aho umuyaga mwinshi uteganyijwe ufite umuvuduko uri hagati ya metero 8 na 10 ku isegonda (ibara ry’icunga rihishije), cyane cyane mu Karere ka Karongi, amajyepfo y’Akarere ka Rutsiro ndetse no mu majyepfo y’Akarere ka Nyamasheke aho umuyaga uri hejuru ya metero 10 (ibara ry’umutuku) ku isegonda uteganyijwe.
Ubushyuhe buteganyijwe: Mu gice cya mbere cy’ukwezi k’Ukwakira 2023, hateganyijwe ubushyuhe bwinshi buri hagati ya dogere Selisiyusi 20 na 32 mu Rwanda. Mu bice byinshi by’Intara y’Iburasirazuba, by’umujyi wa Kigali, Amayaga,no mu kibaya cya Bugarama niho hateganyijwe ubushyuhe bwinshi ku gipimo kiri hagati ya dogere Selisiyusi30 na 32.
Mu majyaruguru y’uturere twa Rubavu, Nyabihu na Musanze muri Parike y’Igihugu y’Ibirunga, nomu ishyamba rya Gishwati niho hateganyijwe ubushyuhe buke buri ku gipimo kiri hagati ya dogere Selisiyusi20 na 22. Ubushyuhe buteganyijwe buri ku kigero cy’impuzandengo y’ubushyuhe busanzwe mu gice cya mbere cy’ukwezi ku Ukwakira.
