Igisirikare cya Repubulika Iharanira Demokarasi ya Congo (FARDC) n’umutwe wa FDLR, barashinjwa kwiba inka zirenga 20 z’umworozi wo muri Teritwari ya Nyiragongo zimwe muri zo bakazirya.
Umuyobozi wa Groupement ya Buhumba byabereyemo, Gasekeri Augustin, yavuze ko izo nka zibwe ku mugoroba wo ku wa Mbere tariki ya 2 Ukwakira 2023.
Yavuze ko “bari bazijyanye ari inka 23, izindi 15 ziza kugaruka.”
Uyu muyobozi yavuze ko inka umunani ari zo zakomeje kuburirwa irengero, bikaba bitekerezwa ko abazibye bamaze kuzirya.
Yagize ati: “Umunani rero birashoboka ko baziriye kuko n’amasasu twumvaga mu kanya bishoboke ko ari zo barimo barasa zirukanka.”
Groupement ya Buhumba ziriya nka zibiwemo isanzwe igenzurwa n’Ingabo za Kenya ziri mu za EAC zoherejwe kugarura amahoro muri RDC.
