Inyeshyamba z’Aba-Houthi zo muri Yemeni zatangaje kuri uyu wa Gatatu, itariki 8 Ugushyingo, ko zarashe indege itagira abapilote y’Abanyamerika, ifite agaciro ka miliyari zisaga 32 z’Amanyarwanda, yagurukaga hejuru y’amazi ya Yemeni.
Mu itangazo ryabo, Aba-Houti bavuze ko ingabo zabo zahanuye indege ya drone yo muri Amerika yo mu bwoko bwa MQ-9 mu gihe yakoraga ibikorwa bikemangwa mu rwego rwo rw’ubufasha bw’Igisirikare cya Amerika kuri Israel.
Itangazo ryongeyeho ko imigambi y’abanzi b’Abanyamerika itazabuza uyu mutwe gukomeza ibikorwa bya gisirikare mu rwego rwo gushyigikira abaturage ba Palesitine.
Nk’uko ABC News ibitangaza, umuyobozi wa Leta Zunze Ubumwe za Amerika yemeye ko drone yo mu bwoko bwa MQ-9 Reaper yahanuwe, avuga ko yari iri mu kirere mpuzamahanga hafi ya Yemeni.
Uyu muyobozi yagize ati: “Dushobora kwemeza ko indege y’igisirikare cya Amerika ya MQ-9 itwarirwa kure yarasiwe ku nkombe za Yemeni n’ingabo z’Aba-Houthi”.
Mu minsi yashize, Aba-Houti batangaje ko bazarasa bakoresheje indege zitagira abadereva n’ibisasu bya misile byerekeza ku bipimo biri muri Israel mu rwego rwo gushyigikira abaturage ba Palesitine kubera igitero cya Israel muri Gaza.
