Abategetsi bo mu Budage baravuga ko bafashe abantu bane bakekwaho kuba muri Hamas bafitanye isano n’umugambi wo kugaba ibitero ku bikorwa by’Abayahudi.
Abashinjacyaha bavuze ko abakekwa bari bagamije kubika intwaro i Berlin kugira ngo bazazikoreshe mu gitero.
Abategetsi ba Danemark na bo bavuze kandi ko bataye muri yombi abantu batatu baregwa gutegura igitero nk’iki ariko ntibyamenyekanye niba iperereza ryakozwe na Danemark n’u Budage rifitanye isano.
Abashinjacyaha b’Abadage bavuze mu itangazo ryabo ko abantu batatu bakekwaho kuba bafitanye isano na Hamas bafatiwe i Berlin undi mu Buholandi. Hamas iyobora Gaza, ifatwa nk’umutwe w’iterabwoba ubujijwe mu Burayi.
Abashinjacyaha b’Abadage bavuga ko batatu bafungiye i Berlin ari Abanyalibani n’Umunyamisiri nk’uko iyi nkuru dukesha BBC ivuga.
Chief Inspector Flemming Drejer wo muri Polisi ya Danemark yavuze ko abantu batatu bakekwa bafatiwe muri Danemark bazashinjwa ibyaha by’iterabwoba.
Umuturage w’u Buholandi na we arakekwa mu iperereza mu rya Danemark, ariko abategetsi ba Danemark ntibaremeza isano n’iperereza ry’u Budage.
Minisitiri w’intebe wa Danemark, Mette Frederiksen, yatangaje ko impungenge z’igitero zari zifite ishingiro.
Ibiro bya Minisitiri w’intebe wa Israel, Benjamin Netanyahu, mu nyandiko yanditse kuri X (yahoze ari Twitter) yavuze ko abantu barindwi batawe muri yombi “bakoraga mu izina rya Hamas”. Mu gihe abashinjacyaha ba leta mu Budage bahujije umugambi na Hamas, abategetsi ba Danemark ntibigeze bemeza ko hari aho bahuriye n’uyu mutwe.
Minisitiri w’ubutabera muri Danemark, Peter Hummelgaard, yavuze ko umugambi uvugwa “wemeza mu buryo bubabaje ko Abayahudi bo muri Danemark bari mu kaga”.
Biteganijwe ko abafatiwe muri Danemark bazitaba urukiko rufunze ku wa Kane utaha.
