Herman J. Cohen wahoze ari Umunyamabanga wa Leta Zunze Ubumwe za Amerika wungirije ushinzwe umugabane wa Afurika, yatangaje ko Perezida Félix Antoine Tshisekedi wa RDC adakwiye kurahizwa ngo ayobore Congo muri manda ye ya kabiri “kuko yibye amatora.”
Uyu mudipolomate yabitangaje mu butumwa yanditse ku rubuga rwe rwa X.
Ni nyuma yo kwifashisha raporo y’Inama y’Abepiskopi muri RDC (CENCO) igaragaza ko amatora yo ku wa 20 Ukuboza yaranzwe n’inenge nyinshi ndetse n’ubujura bw’amajwi bwo ku rwego rwo hejuru; ibyo yahereyeho avuga ko mu gihe Tshisekedi yaba arahiriye kuyobora manda ya kabiri byaba bikozwe mu buryo butemewe.
Yagize ati: “Amatora ya Perezida yo muri RDC yo ku wa 20 Ukuboza yaranzwe n’inenge ndetse n’ubujura bw’amajwi nk’uko bivugwa n’inama y’Abepiskopi Gatolika (CENCO).”
“Ku bw’ibyo, Perezida Tshisekedi ntabwo akwiye kurahizwa kubera ko Perezidansi ye yaba itemewe.”
Amajwi yashyizwe hanze by’agateganyo na Komisiyo y’amatora (CENI) yerekana ko Tshisekedi ari we watsinze amatora nyuma yo kugira amajwi 73%.
Ni intsinzi cyakora itavugwaho rumwe bijyanye n’uko bagenzi be bari bahatanye bashinja Denis Kadima ukuriye CENI kumwibira amajwi.
Cohen kuri ubu ni umwe muri bake beruye bakemeza ko Tshisekedi yatsinze ariya matora atabikwiriye.
Ni Tshisekedi biteganyijwe ko azarahirira manda ya kabiri ku wa 20 Mutarama 2024.
