Uturere twa Kicukiro, Gasabo na Nyarugenge kuri uyu wa Kane tariki ya 22 Kanama twatoye abajyanama baduhagararira mu nama njyanama y’Umujyi wa Kigali, bituma abajyanama bawo buzura 12.
Buri karere katoye umugabo n’umugore nk’uko biteganywa n’itegeko rigenga Umujyi wa Kigali.
Abajyanama batandatu batowe kuri uyu wa Kane barimo Urujeni Martine na Dr. Muhammed Semakula batorewe guhagararira Akarere ka Nyarugenge, Gatera Frank na Baguma Rose batorewe guhagararira Akarere ka Gasabo na Tsinda Aimé na Nyinawinkindi Liliose Larisse batorewe guhagararira Akarere ka Kicukiro.
Aba bajyanama uko ari batandatu biyongera ku bandi nkabo ku wa Gatatu bashyizweho na Perezida Paul Kagame.
Abashyizweho nk’uko bigaragarira mu itangazo ryasohowe n’Ibiro bya Minisitiri w’Intebe, barimo Samuel Dusengiyumva wari usanzwe ari Meya w’Umujyi.
Barimo kandi Dusabimana Fulgence, Flavia Gwiza, Christian Mugenzi Kajeneri, Marie Grace Nishimwe na Jack Ngarambe.
Aba bajyanama uko ari 12 ni bo bagomba kwitoramo abagize Komite Nyobozi y’Umujyi wa Kigali (Meya na ba visi-Meya babiri) na Biro y’Inama Njyanama yawo.
