Ikigo cy’Igihugu cy’Imisoro n’Amahooro (RRA), kuri uyu wa Kabiri tariki ya 5 Ugushyingo cyashimiye abasora bo mu ntara y’Amajyaruguru bahize abandi mu gutanga umusoro.
Ni igikorwa RRA yakoraga ku nshuro ya 22, kikaba cyabereye mu karere ka Musanze.
Mu byashingiweho hashimwa bariya bantu harimo kuba baramenyekanishije bakanishyura imisoro ku gihe, kuba bafite EBM, kuba batanga inyemezabwishyu no kuba nta birarane by’imisoro bafite ndetse no kuba barahize abandi mu turere bakoreramo.
Abashimiwe barimo usora watanze imisoro uko biwiye, uwatanze imisoro yeguriwe inzego z’imitegekere y’igihugu, uwakoresheje EBM kurusha abandi n’umuguzi wahize abandi mu gusaba fagitire za EBM.
Mu karere ka Gicumbi hashimiwe Dusangire ubuzima Ltd, muri Burera hashimirwa Cooperative Baho Neza Butaro, muri Musanze hashimirwa Cooperative SOCOH ltd isanzwe icuruza ibicuruzwa bisembuye, muri Rulindo hashimirwa Cooperative ya RUCUSEC itanga serivisi z’isuku n’umutekano na ho muri Gakenke hashimirwa Cooperative Abakundakawa Rushahi.
Usora wahize abandi mu gukoresha neza EBM muri 2023/2024 mu Ntara y’Amajyaruguru ni Rupia Mathias, mu gihe usora watanze neza imisoro yeguriwe inzego z’ibanze muri 2023/24 mu Ntara y’Amajyaruguru ni Louis Miller.
Ni mu gihe umuguzi wahize abandi mu gusaba EBM Hakizimana William wo mu karere ka Gakenke.
Komiseri Mukuru wa RRA, Niwenshuti Ronald, yagaragaje ko gushimira abasora ari umwanya wo kwereka Abanyarwanda n’abasora umusaruro wavuye mu gukusanya imisoro, kubamurikira bimwe mu byo imisoro yagejeje ku gihugu, no kungurana ibitekerezo ku byanozwa mu mikoranire ya RRA n’izindi nzego.
Iki kigo mu byo cyishimira byagezweho mu mwaka ushize w’ingengo y’imari harimo harimo amategeko yavuguruwe n’amateka ya minisitiri yashyizweho, agamije korohereza abasora.
Harimo nk’itegeko rishyiraho umusoro ku mabuye y’agaciro wavuye ku gipimo cya 6% ukajya hagati ya 0.5% na 3%.
Mu mateka ya Minisitiri yashyizweho harimo amahirwe akomoka ku kwigaragaza ku bushake aho abarenga 5,200 bagaragaje imisoro batamenyekanishije bagakurirwaho ibihano n’inyungu z’ubukererwe.
Muri uyu mwaka kandi hakozwe amavugurura atandukanye mu ikoranabuhanga agamije koroshya imitangire ya serivisi arimo guhagarika TIN z’ubucuruzi (TIN De-registration), hashyizweho sisitemu yoroshya kohereza, kwakira, no gusubiza amabaruwa (ECMS), kwandukura TIN zirenga 40,000 zitakoze no kuzikuriraho ibihano zaciwe na sisitemu y’ikoranabuhanga, no koroshya ibisabwa ku bashaka kwishyura ibirarane by’imisoro.
Guverineri w’Intara y’Amajyaruguru, Muhabowagahunde Maurice, yasabye abasora kumva ko gahunda yo gutanga umusoro bakwiye kuyigira iyabo, bakitabira kuyikoresha neza, ndetse n’abaguzi bakazirikana kwaka inyemezabuguzi ya EBM kuko hari n’ishimwe ribagarukira.
Yasabye kandi abasora bo mu ntara y’Amajyaruguru kwirinda ibikorwa bya magendu n’ibindi bihungabanya ubukungu bw’Igihugu.
Mu mwaka ushize w’ingengo y’imari intara y’Amajyaruguru yinjije miliyari 44.73 Frw zavuye mu misoro y’ubutegetsi bwite bwa Leta, mu yari yihaye intego yo kwinjiza miliyari 48.67 Frw. Iyi ntego yagezweho ku kigero cya 91.9%.
Umusoro weguriwe uturere iyi ntara yinjije miliyari 6.7 mu gihe intego yari ugukusanya agera kuri miliyari 7.3Frw, ibivuze ko intego yagezweho ku kigero cya 91,6%.
Muri 2024/2025 RRA yahawe intego yo gukusanya miliyari 3,061.2 FRW zihwanye na 54% by’ingengo y’imari y’igihugu.
