Urukiko rwisumbuye rwa Nyarugenge rwemeje ko Fatakumavuta, umusesenguzi uzwi cyane kuri murandasi, agomba gukomeza gufungwa iminsi 30 y’agateganyo. Ibi byaturutse ku byaha ashinjwa birimo ivangura, gutangaza amakuru y’ibihuha, kubuza amahwemo hakoreshejwe ikoranabuhanga, no gutukana mu ruhame.
Mu bujurire bwe, Fatakumavuta yari yasabye kurekurwa by’agateganyo, asobanura ko afite impamvu zikomeye zirimo uburwayi bwa diyabete ndetse n’inshingano zo kwita ku muryango we. Yavuze kandi ko amagambo yashinjwe atari ay’ibihuha cyangwa agamije kubangamira amahoro, ahubwo yari gusesengura ibintu bisanzwe. Yongeyeho ko hari abandi bakoze ibintu bisa ariko bo batakurikiranywe.
Yavuze ko ku birego bimushinja kwibasira Bahati, we na Bahati bari barumvikanye neza, bityo ngo nta mpamvu yo kumushinja. Ku bijyanye n’ibirego bya The Ben, yavuze ko uyu muhanzi yamuhaye imbabazi, bityo ngo urubanza rugombaga kurangirira aho.
Urukiko rwagaragaje ko ibyo Fatakumavuta yatanze mu bujurire nta shingiro bifite:
Ku cyaha cyo gukoresha ibiyobyabwenge, urukiko rwemeje ko raporo ya RFI igaragaza ibimenyetso bifatika byo kuba yarabikoresheje, kandi ibyo avuga ko atasinye kuri raporo ntibyatesha agaciro ibizamini byakozwe.
Ku magambo yabwiye The Ben, urukiko rwagaragaje ko ari amagambo yari agamije kumubuza amahwemo, harimo n’ibyavuzwe ko azasuzuguza ubukwe bwe.
Ku birego bya Bahati, urukiko rwemeje ko amagambo yavuzwe ari ivangura kandi yari agamije gusesereza.
Ku birego byose, urukiko rwavuze ko ibikorwa n’amagambo ya Fatakumavuta bifite ingaruka mbi ku bandi bantu ndetse no ku muryango mugari.
Ku birego bijyanye n’uburwayi bwe bwa diyabete, urukiko rwavuze ko gereza zifite ubushobozi bwo kuvura abarwayi, kandi iyo bibaye ngombwa abarwayi bashobora koherezwa mu bitaro byo hanze.
Urukiko rwisumbuye rwa Nyarugenge rwasanze nta mpamvu yatuma Fatakumavuta arekurwa mu gihe iperereza rigikomeje. Yategetswe gukomeza gufungwa by’agateganyo mu gihe cy’iminsi 30, hagategerezwa urubanza rw’ubutabera rwimbitse.
