Leta ya Jubaland yo mu majyepfo ya Somaliya yatangaje ko yacanye umubano na guverinoma nkuru ya Mogadishu. Ibi byatangajwe ku wa Kane nyuma y’inama y’abaminisitiri bo muri iyi leta bakoreye i Kismayo, umurwa mukuru w’ubutegetsi bwa Leta ya Jubaland.
Leta ya Jubaland, imaze igihe itavuga rumwe na guverinoma nkuru, yashinje Perezida wa Somaliya, Hassan Sheikh Mohamud, gukoresha nabi ububasha bwe no kurenga ku itegeko nshinga.
Jubaland yatangaje ko itazemera ivugururwa ry’itegeko nshinga n’amavugurura mu bijyanye n’amatora byemejwe n’imitwe yombi y’inteko ishinga amategeko ya Somaliya mu ntangiriro z’uyu mwaka nk’uko iyi nkuru dukesha Reuters ivuga.
Itangazo ryashyizwe ahagaragara nyuma y’inama ryagize riti: “Guverinoma ya Jubaland ifite inshingano ihabwa n’itegeko nshinga zo kurengera, kubungabunga, no guteza imbere ubumwe n’ubufatanye bw’abaturage bayo.”
Yasabye gushyira imbere amahoro no gukora “mu rwego rwo gutabara igihugu kijegajega ndetse no kubaka igihugu.”
Iri tangazo rije nyuma y’umunsi umwe urukiko rwo mu murwa mukuru wa Somaliya, Mogadishu, rutanze icyemezo cyo guta muri yombi Perezida wa Jubaland, Ahmed Mohamed Islam, uzwi kandi ku izina rya Ahmed Madobe.
Iki cyemezo cyashinjaga Madobe guhungabanya ubumwe bwa Somaliya.
Ku wa Gatandatu, Inteko Ishinga Amategeko ya Somaliya yemeje umushinga w’itegeko ryerekeye amavugurura mu bijyanye n’amatora, haganwa ku gukora amatora ya rusange nyuma y’imyaka ibarirwa muri za mirongo gahunda yo gutora ishingiye ku miryango, impinduka zanzwe na Jubaland na Puntland.
