Umuyobozi wa Batayo 121 y’abakomando mu ngabo za Repubulika ya Demukarasi ya Congo, FARDC, Colonel André Ekembe yavuze ko birukanye abarwanyi b’ihuriro ry’imitwe ya Gumino na Twirwaneho iyobowe na Col. Michel Rukunda (Makanika) mu gace ka Kamombo kari muri Teritwari ya Fizi mu Ntara ya Kivu y’Amajyepfo.
Yabwiye Actualité ati: “Turi muri Kamombo, umwanzi yahunze. Twatangiriye imirwano muri Mikarati, ubu bahungiye muri Nyamara. Turacyari muri Kamombo hamwe n’abasivili bari bihishe mu bihuru, bose bameze neza. Bagarutse ubwo twahageraga, kandi turakurikira umwanzi aho yahungiye. Ni yo mpamvu dusaba abaturage gutuza kubera ko turahari ngo tubarinde.”
Mu gitondo cyo ku wa 27 Ukuboza 2021 ni bwo ingabo za RD Congo zatangaje ko zagabweho igitero n’abarwanyi ba Col. Makanika muri Kamombo, bicamo Col. Yaundé Kyembe n’abandi basirikare batatu, bakomeza kuzikurikira kugeza muri Mikarati, mu bilometero 12.
Ifatwa rya Kamombo https://bwiza.com/?FARDC-ivuga-ko-Colonel-wayo-yiciwe-mu-mirwano-n-abarwanyi-ba-Makanika
Col. Ekembe avuga ko ari bwo abakomando be batangiye kurwanira n’aba barwanyi guhera mu masaa munani y’amanywa, babasha kubasubiza inyuma mu duce twa Nyamara na Chakira basanzwe bafite ibirindiro.
Umuvugizi w’ibikorwa by’igisirikare mu Ntara ya Kivu y’Amajyepfo, Maj. Dieudonné Kasereka FARDC ivuga ko nyuma y’isuzuma yakoze, yasanze nayo yishe abarwanyi 16 ba Col. Makanika.
