Minisitiri w’Ubuzima, Dr. Ngamije Daniel kuri uyu wa 26 Werurwe 2020 yavuze ko hamaze kubarurwa abantu barenga 1000 bahuye n’abarwayi 41 ba Coronavirus bagaragaye mu Rwanda, abarenga 900 muri bo bamaze gukurikiranwa.
Ni mu kiganiro uyu muyobozi ari kugirana n’Ikigo cy’Igihugu cy’Itangazamakuru, akaba asobanura imiterere y’iki cyorezo mu Rwanda.
Minisiteri y’Ubuzima kuri uyu wa 25 Werurwe 2020 ubwo yatangazaga ko habonetse undi murwayi umwe wa Coronavirus, yatangaje ko nta we urembye mu barwayi bose kandi ko bari kwitabwaho neza. Ibi byashimangiwe na Dr. Ngamije muri iki kiganiro.
Tariki ya 14 Werurwe 2020 ni bwo mu Rwanda hagaragaye umurwayi wa mbere wa Coronavirus. Ubwiyongere bwo hejuru bwabayeho ku munsi ni ubwo habonetse abarwayi bashya 17 tariki ya 23 Werurwe.
Muri iki gihugu hafashwe ingamba zitandukanye zo gukumira ikwirakwira ry’iki cyorezo. Hatanzwe amabwiriza abaturage bagomba gukurikiza kugira birinda arimo guhagarika ingendo zitari ngombwa, gukaraba intoki kenshi, guhana intera byibuze ya metero imwe; by’umwihariko bakaguma mu rugo.
Abagaragayeho ibimenyetso nk’ibya Coronavirus nk’umuriro n’inkorora barasabwa guhamagara umurongo utishyurwa wa 114, bagahabwa ubufasha.
