Abasirikare bagera kuri 10 b’u Burundi bari mu butumwa bw’amahoro muri Somalia(AMISOM ) bishwe abandi batanu barakomereka, nyuma y’igitero bagabweho n’umutwe w’iterabwoba wa Al Shabaab.
Amakuru aturuka mu gisirikare cy’u Burundi avuga ko aba basirikare bagabweho igitero gitunguranye ku wa Gatanu tariki ya 13 Nzeri 2019, mu gace ka Shabelle, mu muhanda uhuza imijyi ya Bal’Ad na Johwar.
Amakuru agera ku kinyamakuru SOSMedias/Burundi avuga ko kuri uyu munsi hari n’abasirikare bane b’abofisiye ba Somalia biciwe mu Majyaruguru ya Bal’Ad.
Umutwe wa Al Shabaab wigambye kugaba ibi bitero, ukemeza ko wishe abasirikare byibura 10 b’u Burundi na babiri ba Somalia.
Abasirikare bagabweho igitero ngo ni abo muri batayo ya 54, imodoka yari ibatwaye ikaba yaragabweho igitero na Al shabaab ubwo yavaga i Johwar yerekeza i Mogadiscio.
Umuvugizi wa AMISOM yemeje ko iki gitero cyabayeho ubwo abasirikae bari ku irondo ry’amanywa.
Iki gitero kibaye nyuma y’ikindi cyabaye ku wa 27 Nyakanga 2019, abasirikare barindwi b’u Burundi barimo ofisiye bahasiga ubuzima.
