Ku wa Kane, tariki ya 4 Nzeri 2025, Ingabo za Uganda (UPDF) zatangaje ko abasirikare babiri babo bishwe mu gikorwa cya gisirikare kiri kubera mu Burasirazuba bwa Repubulika Iharanira Demokarasi ya Congo.
Maj Gen Felix Kulayigye, Umuvugizi w’Ingabo za Uganda yavuze ko amakuru yagiye acicikana mbere atari yo, ashimangira ko abo basirikare baticiwe muri Komanda–Eringeti nk’uko byari byatangajwe, ahubwo byabereye ahandi muri ako gace.
Izi ngabo za Uganda ziri gufatanya n’iza Congo (FARDC) mu bikorwa byo kurwanya imitwe y’inyeshyamba irimo ADF, imaze imyaka myinshi ikorera mu ishyamba rya Kivu.
Urupfu rw’aba basirikare rwongeye kugaragaza ubukana bw’iyi mirwano, mu gihe abaturage bo mu duce twa Beni na Ituri bakomeje kugaragaza impungenge z’umutekano n’ubuzima bwabo.
Ubutegetsi bwa Uganda bwijeje ko bukomeje guharanira kugarura ituze mu gace kugarijwe n’imitwe yitwaje intwaro, ndetse bukomeza guha icyubahiro abasirikare bahasiga ubuzima mu rwego rwo kurinda igihugu n’akarere.
