Minisiteri y’Ubuzima mu Rwanda kuri uyu wa 28 Nyakanga 2020 yatangaje ko mu Karere ka Rulindo habonetse abantu babiri banduye Covid-19. Ni mu gihe mu gihugu hose habonetse abanduye iki cyorezo 47 mu bipimo 3521 byafashwe.
Ahandi habonetse abarwayi ba Covid-19 ni muri Kigali, habonetse 36 bapimwe mu midugudu iri mu kato hamwe n’abahuye n’abanduye. I Rusizi habonetse batanu na Nyamasheke ibonekamo bane.
Abamaze gukira ni 1005 harimo 30 b’uyu munsi.
Muri rusange abamaze kugaragaraho iki cyorezo mu Rwanda ni 1926, abakirwaye bageze kuri 916. Ibipimo byose byafashwe ni 251,815.
Batanu ni bo kimaze kwicira mu Rwanda barimo umusaza w’imyaka 65 y’amavuko, umupolisi w’imyaka 24 y’amavuko, umusirikare w’imyaka 51 y’amavuko, umusaza w’imyaka 78 y’amavuko n’umukecuru w’imyaka 88 y’amavuko.
