Kuri uyu wa Gatanu Perezida Paul Kagame yagiranye ibiganiro byo mu muhezo (tête-à-tête) na Faure Gnassingbé wa Togo akaba n’Umuhuza Mukuru w’Umuryango w’Ubumwe bw’Afurika (AU) ku mugambi w’amahoro mu burasirazuba bwa Repubulika Iharanira Demokarasi ya Congo.
Perezida Kagame na Perezida Gnassingbé banahuye n’Itsinda ry’Impuguke ryashyizweho n’Umuryango w’Ubumwe bw’Afurika rigizwe n’abahoze ari abakuru b’Ibihugu bya Afurika.
Iryo tsinda rigizwe na Olusegun Obasanjo wahoze ari Perezida wa Nigeria, Sahle-Work Zewde wahoze ari Perezida wa Ethiopia, Mokgweetsi Masisi wahoze ari Perezida wa Botswana, na Catherine Samba-Panza wahoze ari Perezida wa Repubulika ya Centrafrique.
Ibiganiro bagiranye n’iryo tsinda byibanze ku “gushimangira ihuzabikorwa hagati y’ingamba z’ubuhuza zo ku rwego rw’akarere n’izo ku rwego rw’umugabane.”
Gnassingbé na ziriya mpuguke nyuma yo guhura na Perezida Paul Kagame, biteganyijwe ko bagomba no guhura na Perezida Félix Antoine Tshisekedi wa Repubulika Iharanira Demokarasi ya Congo.
Mu myaka ine ishize ni bwo amakimbirane mu burasirazuba bwa RDC yongeye gufata indi ntera, ubwo ingabo z’iki gihugu zuburaga imirwano n’inyeshyamba zo mu mutwe wa M23.
N’ubwo amahanga yakomeje guhuriza mu biganiro Kinshasa n’uriya mutwe ndetse n’u Rwanda rushinjwa kuwushyigikira, intambara ntirabasha guhagarara.
