Inyeshyamba zo mu mutwe wa M23 zaramukiye mu mirwano ikomeye na Nyatura Leta ya Repubulika Iharanira Demokarasi ya Congo yise ‘Wazalendo’.
Amakuru aturuka muri Congo avuga ko imirwano y’impande zombi yatangiye mu gitondo cyo kuri uyu wa Kabiri tariki ya 29 Kanama.
Yabereye mu midugudu itandukanye yo muri Chefferie ya Bwito, Groupement ya Tongo ho muri Teritwari ya Rutshuru mu ntara ya Kivu y’Amajyaruguru.
Isaac Kibira, umuyobozi muri Guverinoma ya RDC watumwe muri kariya gace yatangaje ko inyeshyamba za M23 ari zo zagabye ibitero ku birindiro bya Nyatura.
Uyu yunzemo ko “abaturage benshi bahunze.”
M23 imaze amezi menshi irwana na Nyatura, nyuma yo guhagarika imirwano n’Ingabo za Repubulika Iharanira Demokarasi ya Congo.
