Minisiteri y’Ubutegetsi bw’Igihugu, MINALOC yakuye amasibo atatu yo mu Mudugudu wa Kabutare muri gahunda ya Guma mu Rugo bitewe n’uko ubusesenguzi bwakozwe n’inzego z’ubuzima bwagaragaje ko nta bwandu bushya bw’icyorezo cya Coronavirus bukigaragara muri ibi bice.
Nk’uko itangazo ryashyizweho umukono na Minisitiri w’Ubutegetsi bw’Igihugu, Prof. Shyaka Anastase kuri iki Cyumweru, amasibo y’Ubutwari’, ‘Icyerekezo’ n’isibo yo ‘Gukunda igihugu’ yo mu mudugudu wa Kabutare, mu Kagari ka Bwerankori, Umurenge wa Kigarama w’Akarere ka Kicukiro akuwe muri gahunda ya Guma mu Rugo (lockdown) uhereye kuri uyu wa 09 Kanama 2020.
MINALOC kandi yibukije ko abatuye mu midugudu yo mu Kagari ka Tetero ko mu murenge wa Muhima iheruka gushyirwa muri gahunda ya Guma mu Rugo ikomeza ikayigumamo kugeza isesengura ry’inzegoz’ubuzima zizagaragariza ko nta cyorezo cya Covid-19 kikihagaragara. Iyo midugudu ni uwa Tetero, umudugudu w’Indamutsa, Umudugudu w’Intiganda.
Abatuye mu bice biri muri guma mu rugo barasabwa gukomeza kubahiriza amabwiriza abigenga bahabwa, kimwe n’Abanyarwanda bose bakaba basabwa gukomeza kubahiriza amabwiriza yo kwirinda icyorezo.
