Itsinda rya Tuff Gang ni itsinda ry’urubyiruko rw’Abanyarwanda rwatangiye rukora umuziki mu njyana ya Hip Hop rubasha kwigarurira imitima y’abato n’abakuru.Tuff Gang yatangiye gukora umuziki wayo mu mwaka wa 2008, abasore batanu barimo Jay Polly, Bull Dog, Fire Man, Green Person na P Fla bashyira hanze indirimbo yabo ya mbere bise “Umunsi w’Imperuka”.
Tuff Gang yinjira mu rugendo rwa Hip Hop nyarwanda yaje irusangamo undi muhanzi witwa Rider Man, umuhanzi na we waje asangamo uwitwa Mc Mahoney Bonny. Rider Man yagize uruhare rukomeye mu kuzamura Hip Hop nyarwanda ari we wenyine, nta tsinda afatanyije na ryo, yewe nta n’umuntu ukurikirana umuziki we nk’uko yabyivuze ibigwi mu ndirimbo ye yise “Amateka”.
Inshamake y’amateka ya Hip Hop mu Rwanda
Mu myaka ya za 1980, ni cyo gihe gisa nk’aho ari yo ntangiriro y’injyana ya Hip Hop mu Rwanda. Umusore wavangaga umuziki DJ Berry (Nsabimana Abdul Aziz), yakoraga akazi ko kuvanga umuziki muri Kigali Night n’ahazwi nka Cosmos ya Nyamirambo akaba ari ko yari n’umunyamakuru kuri Radiyo Rwanda, afatwa nk’uwabaye umuhanzi n’umubyinnyi w’injyana ya Hip Hop wa mbere mu Rwanda.
Mu gihe cya Dj Berry byari bigoye cyane kumvisha ubuyobozi n’imbaga y’abanyarwanda iby’injyana ya Hip Hop, uyu muhanzi yaje kwimukira mu cyahoze ari Zaire muri Repubulika Iharanira Demokarasi ya Congo y’ubu. Dj Berry nyuma yaje kujya mu Budage ahakorera indirimbo yitwa “Hey You”, yamamaye cyane ku maradiyo yo mu Rwanda no muri Uganda. Uyu muhanzi yagarutse muri Afurika mu mwaka wa 1990 akomeza kuzamura Hip Hop mu Rwanda aza kwitaba Imana mu mwaka wa 1996 azize icyorezo cya SIDA.
Mu mwaka wa 1997, KP Robinson na MC Monday bakoze indirimbo bise “Peaced Up”, iba ibaye Hip Hop ya mbere ikozwe n’abanyarwanda igakorerwa mu Rwanda. Ibi kandi binashatse kuvuga ko MC Monday ari umwe mu batumye ubu bwoko bw’umuziki bukomera mu Rwanda. MC Mahoni Boni wanamenyekanye nk’uwatangije Hip Hop mu Rwanda we yinjiye injyana mu mwaka wa 1999 n’indirimbo yise “Malariya ni Indwara Y’icyorezo Kandi Yica.”
Mu mwaka wa 2003 Hip Hop nyarwanda yajemo itsinda ry’abasore ryitwaga KGB (Kigali Group Boys) ryari rigizwe n’abahanzi nka Rurangwa Gaston uzwi nka Skizzy,nyakwigendera Hirwa Henry wamenyekanye nka H-Wow na Manzi Yvan waruzwi nka MYP.
N’ubwo amateka ya Hip Hop mu Rwanda agaragaza ko hari abatangije iyi njyana mu bihe bigoye aho ubutegetsi n’imbaga yabaririmbirwa batahaga agaciro iyi njyana, ntibibujije ko hari abahanzi bumvikana bavuga ko ari bo bami b’injyana ya Hip Hop kandi urugendo rw’umuziki barutangiye mu mu kinyejana cya 21 gusa ntibitangaje kuko kwiyita umwami wa Hip Hop byabaye nk’umwambaro w’abakora iyi njyana cyangwa ikivugo rusange.
Gushinga imizi kwa Tuff Gang no kwigarurira imitima y’abafana
Mu mwaka wa 2008 ubwo Tuff Gang yazaga muri Hip Hop nyarwanda, abafana bari barakomeje kumva no kureba uburyo injyana ya Hip Hop ipfapfana babaye nkabasubiza agatima impembero maze batiza umurindi uru rubyiruko rwari rwiyemeje kugira aho ruvana injyana n’aho ruyigeza nyuma yo gukora indirimbo “Umunsi w’Imperuka” yakunzwe n’abatari bake
Mu kiganiro Jay Polly wafatwaga nk’uhagarariye iri tsinda yagiranye n’itangazamakuru yagize ati” Tuff Gang twayitangije mu mwaka wa 2008, twaje kwihuriza hamwe rero kuko njye nari narakuranye na Green Person. Uwadukoreraga umuziki ni Lick Lick kandi na we muri icyo gihe yari atuye hamwe na Green Person. Uko ni ko kwihuriza hamwe byatangiye.”
Jay Polly yakomeje avuga ko kuber Lick Lick yaraziranye na Green P kandi Green P akaba yari inshuti ye byahise byoroha cyane ko amenyana na Lick Lick. Uyu Lick Lick na we yize hamwe na Bull Dog ndetse mu ishuri rimwe. Ubwo byari byoroshye ko na Bull Dog aba abaye umwe muri bo.
Fire Man yaje kuza mu itsinda nyuma kuko nawe yakuranye na Bull Dog mu gace kamwe I Kanombe. Nyuma P Fla na we yaje kwiyunga kuri iri tsinda aturutse muri Leta Zumze Ubumwe za Amerika kuko na we yari afite injyana imwe n’iyabo maze bakora itsinda rihamye ry’abasore batanu.
Uyu mwaka Tuff Gang yamenyekanyemo ni na wo mwaka Nuur Fassasi wamenyekanye cyane nka Diplomate yumvikanyemo.Diplomate yazamukiye mu ndirimbo ye ya mbere yakoranye na Young Junior.Nyuma y’aha haje abandi benshi nka K8 Kavuyo, Pacson, Jay C na White Monkeyn.Mu mwaka wa 2013 na 2014,umuhanzi Riderman na Jay Polly batsindiye igihembo cya Primus Guma Guma Superstar mu bihembwe bikurikiranye biba intsinzi no kuzamuka kw’ibendera ry’umuziki wa Hip Hop mu Rwanda.
Tuff Gang yakunze kurangwa no gushwana
Uhereye mu mwaka wa 2008, nta gihe kinini cyashize umwe muri aba basore P Fla atavuye muri iri tsinda! Iri tsinda rya Tuff Gang ryajemo amahari ashingiye ku kuba bamwe barikubiraga inyungu z’itsinda ndetse hakazamo n’ubugambanyi. Ibi byaha byombi byegekwaga kuri Jay Polly dore ko yari na we wafatwaga nk’umuvugizi w’itsinda.
Nyuma yo kwiyomora kuri Tuff Gang, P Fla yashinze itsinda rishya yise Emperial Mafia Land rigizwe na we ndetse n’umukobwa babyaranye El Poeta. Muri iri tsinda yakoze indirimbo ze bwite ndetse n’iyo yakoranye na El Poeta yatukaga Jay Polly ku buryo bweruye asa n’umubika ko yapfuye.
Nyuma yo kuba muri Tuff Gang kwa P Fla, bane basigaye ari bo Jay Polly, Green P,Fire Man na Bull Dog na bo bagiye bashwana kenshi ikintu cyatumye bamwe mu bafana babona Jay Polly nk’udashobotse dore ko Fire Man, Bull Dog na Green P baje kongera guhurira mu ndirimbo na P Fla.
Indirimbo ” Amaniga Yanjye ” yahimbwe na Bull Dog yaje kongera guhuza iri tsinda ariko ntibyabuza P Fla kuririmbamo igitero gica amarenga gisa n’ikinenga aba basore babyirukanye aho yavugaga ko abo yita inshuti ze atari abo babyirukanye.
Bane basigaye mu itsinda rya Tuff Gang bagiye bashwana mu myaka ya za 2014 ndetse na nyuma y’aho birakomeza aho bashinze itsinda ryitwava ‘Stone Church’ na ryo nturyamara kabiri.imibanire y’iri tsinda yagiye izamo agatotsi cyane kandi n’ubu ntibari kumwe bisa n’aho buri wese akora ukwe.
Igitaramo cyo kuri YouTube cyongeye guhuza iri tsinda muri 2020
Umunyamamuru w’imyidagaduro kuri Radiyo Rwanda, Lucky Nzeyimana afatanyine na Televiziyo MK1 TV ikorera kuri YouTube bahurije itsinda rya Tuff Gang ku rubyiniro rumwe gusa biza kurangira aba bahanzi bo muri Tuff Gang batawe muri yombi, igitaramo cyabo kirahagarikwa kitarangiye.
Nzeyimana wari uhagarariye iki gitaramo yagize ati” Ndagirango ntangire nihanganisha abari badukurikiye kuri MK1 TV, hajemo ibibazo bitewe n’amabwiriza yo kwirinda Covid-19.”
Amakuru yemeza ko abari hano bose barimo Bull Dogg, Green P, Fireman, P Fla n’abacuranzi ba Symphony Band bahise bafatwa nk’abarenze ku mabwiriza yo kwirinda Covid-19, kimwe na bamwe mu bagize itsinda ryateguye iki gitaramo.Bahise bajyanwa muri IPRC Kicukiro ahakunze kujyanwa abarenze ku mabwiriza yo kwirinda Coronavirus, bakigishwa nyuma bakarekurwa, byaba ngombwa bagacibwa amande.
Abantu bari bashimishijwe cyane no kongera kureba itsinda rya Tuff Gang risubiramo indirimbo ryakoranye kera rikiri umwimerere ndetse benshi bari babifashe nk’amarenga yo kuba no gusubirana bishoboka gusa byarangiye ibyishimo bicagase dore ko hari hamaze kuririmba gusa Green P,Bull Dog naho Fire Man akaba yarahagaritswe na Polisi ari we uri ku rubyiniro.
