Ibiro by’ingabo z’America, Pentagon, byatangaje kuri uyu wa 24 Mutarama 2020 ko abasirikare bayo bangirikiye ubwonko mu gitero cya misile Iran yagabye ku birindiro byabo muri Iraq mu ntangiriro za Mutarama, amakuru aje ahabanye n’ayo Perezida Donald Trump yatangaje.
Tariki ya 8 Mutarama ni bwo ingabo za Iran zarashe misile zirenga 12 ku birindiro 2 by’ingabo za leta zunze ubumwe z’America mu rwego rwo kwihorera ku rupfu rw’umusirikare wabo, Gen. Qassem Soleimani wiciwe ku kibuga cy’indege cya Baghdad tariki ya 3 Mutarama. Umuvugizi wa Pentagon, Jonathan Hoffman ivuga ko aba basirikare bagize ibikomere mu bwonko, yemeza ko abasirikare 17 bacyitabwaho n’abaganga, abandi 17 basubiye mu kazi. Muri aba bakivurwa, 8 bajyanwe mu bitaro muri America kubera ko ikibazo cyabo gikomeye, mu gihe abandi 9 bakivurirwa mu bitaro bya gisirikare by’America biri i Landstuhl mu Budage ari na ho bose bari bajyanwe mbere. Trump wavuze ko nta byangiritse, nta n’inkomere z’iki gitero, yabajijwe ku by’aba basirikare bagize ikibazo cy’ihungabana, asubiza ko yumvishe bamubwira ko ari ‘imisonga yo mu mutwe barwaye, mbese ari ibintu byoroshye. Kuva ku rupfu rwa Gen. Qassem, Iran yavuze ko izihorera, bamwe bavuga ko bashyizeho akayabo k’amafaranga ku muntu uzica uyu mukuru w’igihugu (Trump). Iran yavuze ko ifite ahantu itegeye America, gusa na yo (America) mu ijwi rya Trump ivuga ko na yo ifite aho izarasa hagera kuri 52 ha Iran. Ibyo kwihorera kwa Iran bisa n’ibyatuje nyuma yo gukora ikosa ryo kurasa indege ya Ukraine yari itwaye abantu 176 bose barapfa, isigara irwana no kwisobanura bitewe n’igitutu yashyirwagaho n’amahanga hongeramo abaturage bayo bakoze imyigaragambyo bamagana iki gikorwa cyiswe icy’ubugwari cyo kwica inzirakarengane.Iyi ndege yarashwe ubwo ingabo za Iran zoherezaga za misile ku birindiro by’ingabo z’America muri Iraq.
America yatangaje ko abasirikare bayo 34 bakomerekeye mu gitero cya Iran
Sangiza iyi nkuru
Soma Izindi Nkuru
