APR FC kuri uyu wa Kabiri tariki ya 11 Nyakanga 2023, yamenyesheje abakinnyi 10 mu bayikiniraga ko itazakomezanya na bo, abandi babiri irabatiza.
Ku gicamunsi cyo kuri uyu wa Kabiri ni bwo ubuyobozi bw’iyi kipe y’Ingabo z’Igihugu bwahuriye mu nama n’abakinnyi bayo. Ni inama yabereye ku biro by’iyi kipe ku Kimihurura.
Imwe mu mpamvu z’iyi nama kwari ugusobanurira abakinnyi gahunda nshya ikipe iheruka gufata, no kumenyesha abatakiri mu mibare y’ikipe kujya gushakira ahandi.
Mu bakinnyi 10 beretswe umuryango harimo Manishimwe Djabel wari usanzwe ari Kapiteni w’iyi kipe.
Uyu mukinnyi wari umaze imyaka ine muri APR FC nyuma yo kuyigeramo muri 2019 avuye muri Rayon Sports, yirukanwe nyuma y’uko mu mwaka ushize yari yagiranye ibibazo n’uwari umutoza we, Mohammed Adil Erradi byanatumye uyu munya-Maroc na we atandukana n’iriya kipe.
Ibibazo Djabel yagiranye na Adil byabaye intandaro yo gusubira inyuma kwe binatuma atakaza burundu umwanya wo kubanza mu kibuga.
Abandi basezerewe barimo Itangishaka Blaise, Rwabuhihi Aimé Placide, Ishimwe Fiston, Ndikumana Fabio, Nsanzimpfura Keddy, Ndayishimiye Dieudonné ‘Nzotanga’, Uwiduhaye Aboubakar na Nsengiyumva Irshad Parfait.
APR FC kandi yatandukanye na Mugisha Bonheur ‘Casemiro’ bivugwa ko yamaze kubona ikipe nshya mu gihugu ya Libya.
Abakinnyi babiri iyi kipe igomba gutiza barimo Ishimwe Anicet cyo kimwe na Yves Mugunga bombi bagomba gutizwa Mukura VS.
