Ikipe ya AS Kigali yongeye gusubira Police FC iyitsinda ibitego 2-0, mu mukino wa shampiyona wo mu tsinda rya gatatu (C) wabaye kuri uyu wa kane.
Ni umukino amakipe yombi yahuyemo anganya amanota 9, bigasobanura ko yishakagamo igomba kuyobora itsinda.
Ibitego byo ku munota wa 24 w’umukino bya Fiston Nkinzingabo na Shaban Hussein ku munota wa 77, byari bihagije kugira ngo AS Kigali yegukane amanota atatu, ikomeza kuyobora itsinda C n’amanota 12.
Iyi kipe y’Abanyamujyi irarusha Police amanota atatu, na yo ikarusha Musanze FC ya gatatu amanota atatu.
Iyi kipe ya Musanze yashimangiye umwanya wa gatatu nyuma yo kongera gutsinda Etincelles ibitego 3-1, mu mukino wabereye kuri Stade Ubworoherane.
Etincelles ni yo yabanje gufungura amazamu ibifashijwemo na Songa Isae ku munota 12, mbere y’iminota ibiri ngo Mutebi Rachid yishyurire Musanze.
Iyi kipe yatsinze igitego cya kabiri ku munota wa 36 ibifashijwemo na Kapiteni wayo Twizerimana Onesme, itsinda agashinguracumu ku munota wa 83 ibifashijwemo na Nshimiyimana Ibrahim.
Musanze yasoje umukino ifite abakinnyi 10 nyuma y’ikarita itukura yo ku munota wa 83 yeretswe myugariro Dushimumugenzi Jean.
Mu yindi mikino yabaye, ikipe ya Marines FC yongeye gutsinda Sunrise ibitego 2-1, ikomeza kuyobora itsinda D n’amanota 10.
Iyi kipe y’i Rubavu ikurikiwe na Espoir FC yagize amanota 9, nyuma yo kujya gutsindira Mukura VS i Huye igitego 1-0.
Iyi Mukura ni yo ikomeje kuba iya nyuma muri ririya tsinda n’amanota abiri, ane inyuma ya Sunrise ya gatatu.
