Uwahoze ari myugariro w’icyamamare muri Manchester United, Ashley Young w’imyaka 40 ari kumwe n’umuhungu we Tyler Young w’imyaka 19, bagiye kuba abakinnyi ba mbere mu mateka y’ikiciro cya kabiri mu Bwongereza bakina mu ikipe imwe ari umubyeyi n’umwana.
Byari byitezwe ko uyu mwihariko uba mu mwaka ushize ubwo Everton (yari ifite Ashley Young) yahuraga na Peterborough (yarimo Tyler) mu mikino ya FA Cup, ariko icyo gihe Tyler ntiyahawe umwanya wo kwinjira mu kibuga, bituma ayo mateka atabaho.
Ubu ariko, Tyler yinjiye mu ikipe ya Ipswich Town aho se akinira kuva muri Nyakanga 2025, nyuma y’uko yari yaranyuze mu makipe y’abato ya Arsenal, MK Dons na QPR, hanyuma akerekeza muri Peterborough mu 2024.
Mu gihe gito yari amaze yo, yakinnye umukino umwe wa EFL Trophy ndetse agaragara ku ntebe y’abasimbura mu mikino ya League One, FA Cup ndetse na Carabao Cup. Byongeye, yigeze guhamagarwa mu ikipe yari ihanganye na Everton, ariko ntasohokere mu kibuga ngo ahangane na se.
