Umunya-Cameroun Assana Nah Innocent ukina aca mu mpande yageze mu Rwanda ku mugoroba wo ku wa Gatatu, tariki ya 22 Mutarama 2025 aho agiye gusinyira Rayon Sports FC.
Assana yageze ku Kibuga Mpuzamahanga cy’Indege cya Kigali yakirwa na Perezida w’abafana ba Rayon Sports, Claude Muhawenimana ndetse na Aziz Bassané barakuranye mu irerero ry’umupira muri Cameroun.
Uyu mukinnyi wari usanzwe akinira Coton Sport FC de Garoua muri Cameroun, yayikiniye imikino ya CAF Champions League na CAF Confederation Cup, akaba ayisize ku mwanya wa gatandatu muri shampiyona y’iwabo.
Uyu musore yigeze gukinira Moghreb Tétouan yo muri Maroc na Colombe Sport FC yo muri Cameroun.
Assana Nah asanze Rayon Sports FC imaze gusinyisha abandi bakinnyi bashya barimo Raymond Lolendi Ntaudyimara wo muri Tanzania na Ntamba Musikwabo Malick waturutse muri Repubulika Iharanira Demokarasi ya Congo.
