Ikipe ya APR FC ikomeje kwitegura umwaka utaha w’imikino kuri uyu wa Gatandatu yanyagiye Rwamagana City yo mu kiciro cya kabiri ibitego 7-1, mu mukino wa gicuti amakipe yombi yari ahuriyemo i Shyorongi.
APR FC izahararira u Rwanda mu mikino ya CAF Champions league na CECAFA Kagame Cup, ndetse n’imikino y’amarushanwa atandukanye akinirwa imbere mu gihugu.
Igice cya mbere cy’umukino iyi kipe yatsinzemo Rwamagana cyarangiye ifite ibitego bine.
Rutahizamu Byiringiro Lague ni we wafunguye amazamu ku munota wa 24, anatsindira iyi kipe y’Ingabo z’u Rwanda igitego cya gatatu ku munota wa 30.
Hari nyuma y’iminota ibiri Niyomugabo Claude atsinze igitego cya kabiri.
Igitego cya kane cya APR FC cyatsinzwe na myugariro Ndayishimiye Dieudonné bita Wakaso wavuye muri AS Muhanga, ku munota wa 43 w’umukino.
Mu gice cya kabiri cy’umukino APR FC yabonye ibindi bitego bitatu, birimo icya Nshuti Innocent cyo ku munota wa 47, icya Ruboneka Jean Bosco ku wa 54 na Nsanzimfura Keddy ku munota wa 64.
Iyi kipe yanakinnye undi mukino wa gicuti n’ikipe ya Rutsiro FC yo mu Burengerazuba bw’u Rwanda.
