Kamana Bokota Labama wahoze akina nka rutahizamu muri Rayon Sports, APR FC ndetse n’Ikipe y’Igihugu ‘Amavubi’, yagizwe umutoza wungirije w’Ikipe ya Addax Sports Club.
Iyi Addax ikina muri shampiyona y’icyiciro cya kabiri hano mu Rwanda, yahoze yitwa Rugende FC mbere yo kugurwa na Mvukiyehe Juvenal wahise ayihindurira izina.
Bokota azaba yungirije Ndemeye Jean Louis uzwi nka Fils.
Bokota Labama w’imyaka 38 y’amavuko, yakiniye Rayon Sports kugeza muri 2008 mbere yo kuyivamo yerekeza muri APR FC yakiniye umwaka umwe.
Uyu rutahizamu wamenyekanye nk’Igikurankota yanakiniye igihe gito amakipe ya Kiyovu Sports, Musanze FC na AS Muhanga.
Bokota kandi yakiniye Amavubi imikino 33, ayatsindira ibitego 13.
