Abantu benshi batuye mu mujyi wa Bujumbura mu Burundi bari kugura imiti irimo inturusu, umuravumba, tangawizi n’ibindi, kubera ko bizera ko yabarinda icyorezo cya Covid-19.
Iyi miti iri gucuruzwa n’urubyiruko mu duce dutandukanye tw’uyu mujyi, ku mifungo. Umufungo umwe w’inturusu cyangwa umuravumba uri kugurwa hagati y’amafaranga y’u Burundi 1500 n’2000.
Ibitangazamakuru UBM News na Buja Express bivuga ko kugura iyi miti gakondo biri guterwa n’impungenge abatuye muri uyu mujyi bafite ko iki cyorezo cyaba cyarabagezemo, abaganga bo kubitaho bakaba ari bake, ndetse n’ibipimo bifatwa bikaba bikiri hasi.
Abatuye i Bujumbura kandi bakeka ko imfu ziberayo zishobora kuba ziterwa n’iki cyorezo, n’ubwo nta baganga babapima ngo babyemeze.
N’ubwo aba Barundi bizera ko inturusu, umuravumba, tangawizi n’ibindi byakingira cyangwa bikavura Covid-19, nta rwego na rumwe rw’ubuzima rwaba mpuzamahanga cyangwa urwo mu gihugu rurabyemeza ndetse bizwi ko iki cyorezo kitarabonerwa umuti cyangwa urukingo.
Imibare y’ishami ry’Umuryango w’Afurika Yunze Ubumwe rishinzwe ubuzima, Africa CDC, yo kuri uyu wa 22 Kamena 2020 igaragaza ko mu Burundi hamaze kuboneka abantu 144 banduye Covid-19, 93 bamaze gukira n’umwe wapfuye.
