Lieutenant-Général de Police (Rtd) Gervais Ndirakobuca wari usanzwe ari Minisitiri w’Intebe w’u Burundi, kuri uyu wa Kabiri tariki ya 5 Kanama yatorewe kuba Perezida wa Sena y’iki gihugu.
Gen. Ndirakobuca bakunda kwita Ndakugarika, yatorewe mu matora yabereye ku cyicaro gikuru cya Sena y’u Burundi mu mujyi wa Gitega.
Yatowe ku majwi 100% bijyanye no kuba ari we wari umukandida rukumbi kuri uriya mwanya.
Uyu mugabo w’imyaka 55 y’amavuko, agomba kuyobora Sena y’u Burundi mu myaka itanu iri imbere. Abandi bazafatanya na we ni Générose Ngendanganya watorewe kuba Visi-Perezidante wa mbere na Clotilde Kampimbare watorewe kuba Visi-Perezidante wa kabiri.
Uko ari batatu bose ni abarwanashyaka b’ishyaka CNDD-FDD riri ku butegetsi mu Burundi; ibivuze ko Sena y’iki gihugu n’umutwe w’abadepite byose bigomba kuyoborwa na ririya shyaka.
Impamvu ni uko mu matora y’abadepite yabaye muri Kamena CNDD-FDD ari yo yegukanye imyanya yose yahatanirwaga mu Nteko Ishinga Amategeko uko ari 100. Iyi myanya yiyongeraho indi 11 yagenwe hagendewe ku ihame ry’uburinganire bw’abagore n’abagabo ndetse n’amoko.
Ndirakobuca yari Minisitiri w’Intebe w’u Burundi kuva muri Nzeri 2022, ubwo yasimburaga kuri uwo mwanya Gen. Alain-Guillaume Bunyoni kuri ubu ufunze nyuma yo guhamywa ibyaha birimo gushaka guhirika ku butegetsi Perezida Evariste Ndayishimiye.
Mbere yaho yari Minisitiri w’Umutekano w’Imbere mu gihugu.
Gen. Gervais Ndirakobuca yasimbuye ku mwanya wa Perezida wa Sena y’u Burundi Emmanuel Sinzohagera wari Perezida wayo kuva muri 2020.
