Umusore w’umuseriveri yapfuye nyuma y’iminsi ibiri akubiswe bikabije n’abapolisi babiri n’umucamanza. Ibyago byabaye ku itariki ya 16 Nyakanga muri Komini ya Tangara, mu Ntara ya Butanyerera, mu majyaruguru y’u Burundi. Aba bakozi batatu ba leta batawe muri yombi bafungirwa i Ngozi.
Abatangabuhamya benshi bavuga ko ibi byabereye muri resitora y’aho Donatien Nduwimana yakoraga akazi ko guseriva.
Umucamanza w’urukiko rw’ibanze rwa Tangara, utarishimiye serivisi yahawe ndetse n’ukuntu isahani yagaburiweho imeze, bivugwa ko yatangiye gutimbagura uyu musore ku buryo bukabije.
Nyuma ngo yahamagaye abapolisi babiri, aho kugira ngo batabare bifatanya na we gukubita umukozi wa resitora.
Donatien Nduwimana yahise ajyanwa mu bitaro bya Ngozi apfa ku itariki ya 18 Nyakanga azize ibikomere nk’uko tubikesha SOS Medias Burundi.
Ubushinjacyaha bwategetse guta muri yombi abo bantu batatu bakekwaho icyaha. Bafungiye muri gereza ya Ngozi, ubu bakaba barimo gukorwaho iperereza.
