Umurwayi wa Covid-19 witwa Amissi Bukuru ku wa 9 Mutarama 2021, yarafashwe nyuma yo gushakishwa yatorotse ibitaro bya Nyanza-Lac biherereye mu Ntara ya Makamba, tariki ya 8.
Nk’uko SOS Media yabitangaje, uyu mugabo w’imyaka 39 y’amavuko, yageze mu Burundi avuye muri Afurika y’Epfo, ubwo yageraga ku mupaka uhuza Tanzania n’u Burundi, arapimwa, bamusangamo iki cyorezo.
Icyo gihe abashinzwe kwita ku barwayi ba Covid-19 bamujyanye mu bitaro bya Nyanza-Lac, ahasanzwe hacumbikirwa abafite iki cyorezo, gusa aza gutoroka.
Impuruza y’uko Bukuru yatorotse yaratanzwe, abapolisi batangira kumushakisha. Ubwo bapimaga abagenzi mu mihanda, batahuye uyu mugabo mu modoka yari igeze mu gace ka Mvugo garerereye muri Komini ya Nyanza-Lac mu Ntara ya Makamba, yerekeza mu Ntara ya Bujumbura.
Kubera ko Bukuru yari mu modoka itwaye abandi bagenzi barenga 26, na bo bafashwe kugira ngo babanze bapimwe iki cyorezo.
Uwanduje abandi, azafatwa nk’umurozi
Perezida w’u Burundi, Evariste Ndayishimiye ubwo yagiranaga ikiganiro n’itangazamakuru mu mpera z’umwaka ushize, yatangaje ko uzafatwa yaranduje abandi iki cyorezo, azafatwa nk’umurozi.
Ni nyuma y’aho bigaragariye ko hari abaturuka mu bihugu byo hanze, bagakerensa ingamba zo kujya mu kato, bakajya mu miryango yabo. Ati: “Nimwiyumvire nk’umuntu uva hanze avuye aho barwaye Corona, akagerageza guhatiriza kugira ngo agere iwe mu muryango; ni ukuvuga kugira ngo atangire kwanduza abana be n’umugore. Murumva iryo bara? Icyo kintu cyananiye kukiyumvisha njyewe mpora mvuga nti hariho Abarundi bakirwaye. Hariho indwara za zindi bita psychologique (zo mu mutwe), wasanga ari zo Abarundi bamwe barwaye.”
Ni ho yahereye avuga ko uwo bizagaragara ko yanduje abandi, azafatwa nk’umurozi. Ati: “Navuze ko ubu njyewe uwo nzajya mbona ari hagati mu gihugu arwaye, tuzajya dukurikira uwamwanduje, uwamwanduje, wowe wandujwe na nde wowe wandujwe na nde, kugeza dufashe uwayizanye. Uwo muntu azafatwa nk’uko ari umurozi waje kuroga u Burundi.”
