Perezida w’inzibacyuho wa Niger, Général Abdourahamane Tiani, ku wa Kane yahuye na mugenzi we Capitaine Ibrahim Traoré wa Burkina Faso ubwo yagiriraga uruzinduko rw’akazi yagiriraga muri icyo gihugu.
Ni rwo ruzinduko rw’akazi rwa mbere Gen. Tiani yari agiriye mu mahanga kuva ahiritse ubutegetsi bw’uwari Perezida, Mohamed Bazoum.
Uruzinduko rwa Bazoum muri Burkina Faso rwari mu rwego rw’ubucuti.
Perezidansi ya Burkina Faso yatangaje ko we na Capt Traoré baganiriye “ku bibazo ibihugu byombi bisangiye, by’umwihariko kurwanya iterabwoba ndetse no guteza imbere iterambere ry’imibereho myiza y’abaturage.”
Uruzinduko rwa Gen Tiani muri Burkina Faso rwaje rukurikira urwo yari yagiriye i Bamako muri Mali, rwasize anabonanye na mugenzi we Col. Assimi Goà¯ta wa kiriya gihugu.
Ni uruzinduko rwasize ashimiye ubutegetsi bwa Mali ndetse n’abaturage b’icyo gihugu “ku bw’ubufasha ndetse no kwiyemeza gukorana n’ubutegetsi bwa Niger ndetse n’abaturage bayo mu kwigobotora imbogamizi izo ari zo zose.”
Muri Nyakanga uyu mwaka ubwo hari ubwoba bw’uko ibihugu byo mu muryango w’ubukungu wa Afurika y’Iburengerazuba (CEDEAO) byashoboraga kugaba ibitero kuri Niger mu rwego rwo gusubiza ubutegetsi Bazoum, Mali na Burkina Faso byiyemeje kuyitabara.
Kuri ubu ibi bihugu bifite gahunda yise iyo kurinda ubusugire bwabyo bihuriyeho, Tiani akavuga ko igamije guhindura Sahel akarere k’ubukire aho kuba akarere kamunzwe n’umutekano muke nk’uko bisanzwe bizwi.
