Ikipe ya Simba Sports Club yo mu gihugu cya Tanzania yaraye isezerewe mu mikino ya CAF Champions league, nyuma yo gutsindwa na Wydad Athletic yo muri Maroc kuri penaliti 4-3.
Byari nyuma y’uko amakipe yombi yari arangije imikino yombi anganya igitego 1-1.
Simba yari yasuye Wydad ifite Igikombe cya CAF Champions league cy’umwaka ushize mu mukino wo kwishyura wa ¼ cy’irangiza wabereye kuri Stade Mohammed V i Casablanca.
Ni umukino iyi kipe y’umutoza Robertinho yasabwaga byibura kunganya ikagera bwa mbere muri ½ cy’irangiza, dore ko mu mukino ubanza wari wabereye i Dar es Salaam mu cyumweru gishize yari yatsinze igitego 1-0.
Igitego cyo ku munota wa 24 w’umukino cya Bouly Junior Sambou ni cyo cyafashije Wydad Casablanca kwishyura umwenda yari yakuye muri Tanzania; mbere y’uko hiyambazwa za penaliti.
Byari nyuma y’uko iminota isanzwe y’umukino yari irangiye rwabuze gica.
Muri penaliti eshanu Simba yateye eshatu muri zo zinjijwe na Erasto Nyoni, Saido Ntibazonkiza na Moses Phiri; mu gihe Shomari Kapombe na Clatous Chota Chama bazihushije.
Wydad nyuma yo kugera muri ½ cy’irangiza hari amahirwe menshi y’uko igomba guhura na Mamelodi Sundowns yo muri Afurika y’Epfo.
Iyi kipe ifitanye umukino wo kwishyura na CR Belouizdad bagomba guhura kuri uyu wa Gatandatu, gusa hari amahirwe menshi y’uko iza kuyisezerera nyuma yo kuyinyagira ibitego 4-1 mu mukino banza wa ¼ cy’irangiza wabereye muri Algeria.
