Akanama gashinzwe imyitwarire mu Mpuzamashyirahamwe y’Umupira w’Amaguru muri Afurika, CAF, kafatiye ibihano ibihugu bya Sénégal na Maroc kubera ibikorwa bigayitse byagaragaye ku mukino wa nyuma w’Igikombe cya Afurika cya 2025.
Ni igikombe Sénégal yegukanye nyuma yo gutsindira Maroc imbere y’abafana bayo igitego 1-0.
Uyu mukino wahagaze iminota irenga 20, nyuma y’uko abakinnyi ba Sénégal babisabwe n’umutoza wabo, Pape Thiaw bari bivumbuye bakava mu kibuga, nyuma yo kutishimira ibyemezo by’umusifuzi Jean-Jacques Ndala wari wari umaze guha Maroc Penaliti.
Ni penaliti yaje guhushwa na rutahizamu Brahim Diaz, mbere y’uko Pape Gueye atsindira Sénégal igitego cyayihesheje igikombe.
CAF ibinyujije ku rubuga rwayo rwa Internet yatangaje ko ibyabaye kuri uriya mukinnyi byatumye ifatira ibihano Ishyirahamwe ry’Umupira w’Amaguru rya Sénégal (FSF), Ishyirahamwe ry’Umupira w’Amaguru rya Maroc (FRMF), ndetse n’abakinnyi n’abayobozi batandukanye, kubera kurenga ku itegeko rigenga imyitwarire ryayo.
Mu bihano byahawe FSF harimo guhagarika umutoza Pape Bouna Thiaw imikino itanu ya CAF yemewe, kubera “imyitwarire idahwitse, kurenga ku mahame ya fair-play n’ubunyangamugayo, no gutesha isura umupira w’amaguru.”
Thiaw kandi yaciwe amande ya $ 100,000.
CAF kandi yahagaritse abakinnyi Iliman Cheikh Baroy Ndiaye na Ismaïla Sarr imikino ibiri, kubera “imyitwarire idahwitse” bagaragaje ku musifuzi.
FSF yanaciwe amande angana na $ 300,000 kubera “imyitwarire idahwitse y’abafana bayo, yangije isura y’umupira w’amaguru.”
Hari kandi andi $ 300,000 yaciwe ririya shyirahamwe, kubera “imyitwarire idahwitse y’abakinnyi bayo n’abatoza, barenze ku mahame ya fair-play, ubunyangamugayo n’ubwizerane.”
FSF yanaciwe $ 15,000 bijyanye no kuba abakinnyi batanu ba Sénégal barahawe amakarita y’umuhondo.
Ibi bivuze ko usibye kuba Sénégal yahagarikiwe abakinnyi n’abatoza, inagomba gutanga amande ya $ 715,000 (arenga Frw miliyari 1).
FRMF ya Maroc yo yahawe ibihano birimo guhagarika abakinnyi: Achraf Hakimi wahagaritswe imikino ibiri ya CAF yemewe, irimo umukino umwe washyizweho igihano gisubitswe mu gihe cy’umwaka umwe kubera imyitwarire idahwitse.
Hanahagaritswe Ismaël Saibari wahanishijwe kudakina imikino itatu kubera imyitwarire idahwitse.
Saibari yanaciwe amande ya $ 100,000, FRMF icibwa $ 200,000 “kubera imyitwarire idakwiye y’abana bafata imupira (ball boys)” ndetse n’andi $ 100,000 kubera imyitwarire idahwitse y’abakinnyi b’ikipe y’igihugu n’abagize abatoza, bagiye ahari VAR na $15,000 kubera ikoreshwa rya ‘laser’ ku bafana ba Maroc mu gihe cy’imikino.
Ibi bivuze ko Maroc yaciwe $415,000 (arenga Frw miliyoni 600).
