Capitaine Eraste Ndayishemeze wo mu ngabo z’u Burundi (FDNB), yiciwe mu mirwano yasakiranyije ingabo z’u Burundi n’imitwe ya Twirwaneho na AFC/M23.
Uyu ofisiye yishwe ku wa Kane w’iki cyumweru, agwa mu gace ka Point-Zéro ko muri Teritwari ya Fizi ho mu ntara ya Kivu y’Amajyepfo, aho ingabo z’u Burundi zari zagabye igitero.
Ni imirwano amakuru avuga ko yanakomerekeyemo abandi basirikare batandatu b’Abarundi.
Capitaine Eraste Ndayishemeze wari ufite imyaka 40 y’amavuko, yavukiye muri Komine Rutovu ho mu ntara ya Bururi.
Yinjiye mu gisirikare cy’u Burundi muri 2010, arangiza amasomi ya ba Ofisiye muri 2016.
Uyu musirikare amakuru avuga ko yarashwe na drone, mbere yo koherezwa muri RDC yari asanzwe ari umwarimu wa gisirikare mu kigo cy’ingabo z’u Burundi bo mu mutwe w’abakomando i Gitega.
Uyu musirikare bivugwa kandi ko yize igisirikare mu bihugu bya Gabon n’u Bushinwa.
