Ikipe ya Chelsea FC yatangaje Frank Lampard nk’umutoza wayo w’agateganyo, nyuma yo kwirukana Graham Potter wahoze ari umutoza wayo mukuru.
Chelsea ibinyujije ku rubuga rwayo rwa Internet yavuze ko uriya munyabigwi wayo agomba kuyitoza kugeza umwaka w’imikino wa 2022/23 urangiye.
Frank Lampard azatoza Chelsea umukino we wa mbere ku wa Gatandatu w’iki cyumweru ubwo izaba ihura na Wolves muri shampiyona.
Uyu mutoza kandi ni we ugomba kuyitoza ubwo izaba ihura na Real Madrid mu mikino ibiri ya ¼ cy’irangiza cya UEFA Champions league.
Lampard w’imyaka 44 y’amavuko si mushya muri Chelsea, kuko usibye kuba yarayikiniye yanayitoje hagati ya 2019 na 2021, mbere yo kwirukanwa agasimburwa n’Umudage Thomas Tà¼chel.
Uyu Mwongereza mbere yo kongera guhabwa akazi na Chelsea yaherukaga kwirukanwa na Everton yari yaragezemo mu mwaka ushize wa 2022.
Umuherwe wa Chelsea, Todd Boehly, yatangaje ko bahisemo Frank Lampard bijyanye no kuba afite “imico ndetse n’ibiranga” umutoza uzafasha iyi kipe kurangiza neza umwaka w’imikino.
Amakuru avuga ko umunya-Espagne Luis Enrique ari we ushobora guhabwa amahirwe yo kuba umutoza mukuru wa Chelsea.
