Ku wa Gatanu, Pfizer Inc yahanuye ko icyorezo cya COVID-19 kizakomeza kuzunguza abatuye Isi kugeza mu 2024 ivuga ko doze nto y’urukingo rw’abana bafite hagati y’imyaka ibiri n’ine rwatanze ubudahangarwa bw’umubiri kuruta uko byari byitezwe.
Umuyobozi mukuru ushinzwe ubumenyi muri Pfizer, Mikael Dolsten, mu kiganiro yagejeje ku bashoramari yavuze ko iyi sosiyete iteganya ko uturere tumwe na tumwe tuzakomeza kubona urugero rw’icyorezo cya COVID-19 mu mwaka utaha cyangwa ibiri.
Mu bindi bihugu kizahinduka icyorezo kigaragara mu bantu runaka cyangwa ahantu runaka (endemic) gishobora gucungwa nk’uko iyi nkuru dukesha Reuters ikomeza ivuga.
Isosiyete yavuze ko mu 2024, iki cyorezo kizaba “endemic” ku Isi.
Dolsten ati: “Igihe n’ibi bizabera bizaterwa n’ihindagurika ry’indwara, uburyo sosiyete ikoresha neza inkingo n’imiti, ndetse no gukwirakwiza mu buryo bungana aho umubare w’inkingo ari muke”. “Kugaragara kw’ubwoko bushya bishobora nabyo kugira ingaruka ku kuntu icyorezo gikomeza kubaho.”
Pfizer yateguye urukingo rwa COVID-19 hamwe na BioNTech SE yo mu Budage, kuri ubu ikaba iteganya ko izinjiza miliyari 31 z’amadolari umwaka utaha. Irateganya gukora inkingo miliyari 4 mu mwaka utaha.
Uru ruganda rukora imiti kandi ruri gukora ibinini bya Covid byitwa Paxlovid bizagabanya kujya mu bitaro ndetse n’impfu z’abantu bafite ibyago byinshi hafi 90%.
