Umuyobozi Mukuru Wungirije wa Polisi y’u Rwanda ushinzwe ubutegetsi n’abakozi, DCG Jeanne Chantal Ujeneza, kuri uyu wa Mbere, itariki 15 Nzeri, yatangije ku mugaragaro inama y’iminsi itatu igenzura ubushobozi mu rwego rw’ibikoresho n’amahugurwa bihabwa Polisi n’Ingabo boherezwa mu butumwa bw’amahoro. Inama yabereye ku cyicaro gikuru cya Polisi y’u Rwanda ku Kacyiru.
Ni inama iba mu myaka ine ikaba yitabiriwe n’intumwa z’Umuryango w’Abibumbye ziyobowe na Michael Mulinge Kitivi, umuyobozi w’ishami rishinzwe ubushobozi bwa Polisi n’ingabo bakorera mu butumwa bw’amahoro.
Iyi nama izasuzuma igiciro gitangwa mu rwego rwo gutegura abapolisi n’ingabo, ibikoresho bifashisha, ubuvuzi, n’ubwikorezi mu gihe cy’imyitozo ibanziriza kujya mu butumwa bw’amahoro.
U Rwanda ruri ku mwanya wa kabiri mu bihugu byohereza Polisi n’Ingabo mu butumwa bw’amahoro bw’Umuryango w’Abibumbye.
