Umuhanzi w’icyamamare wo muri Tanzania, Diamond Platnumz, yongeye kwerekana ubuhanga n’imbaraga mu muziki, ataramira abafana be mu gitaramo cyabereye kuri Manchester Academy kuri uyu wa Gatandatu, itariki ya 14 Kamena 2025, gikurikiranye n’ikindi gikomeye yari amaze gukorera kuri Royal Albert Hall i London.
Nk’uko byemejwe n’urubuga rwizewe rwa Bandsintown, iki gitaramo cyari igice cya gatatu cy’uruhererekane rw’ibitaramo Diamond Platnumz arimo gukorera mu Bwongereza, nyuma y’icyabaye i Birmingham no kuri Royal Albert Hall ku wa 13 Kamena 2025. Icy’ i London cyari cyabaye igitaramo cy’amateka, cyaranzwe n’imbaga y’abafana buzuye inyubako, ndetse cyanitabiriwe n’abahanzi bazwi barimo Tiwa Savage, Patoranking, na Flavour.
Mu gitaramo cy’i Manchester, Diamond Platnumz yacuranze umuziki w’umwimerere (umuziki wa live), aririmbana n’abafana be mu ndirimbo ze zakunzwe nka Zuwena, Jeje, Number One, Yatapita n’izindi, zose aziririmba n’amarangamutima menshi ndetse n’imbaraga zimuranga mu bitaramo bye byo ku rwego mpuzamahanga.
Amashusho y’iki gitaramo yakwirakwijwe ku mbuga nkoranyambaga nka YouTube na TikTok, agaragaza uburyo Diamond yaririmbanaga n’abafana be, bose bafatanya ijwi rimwe mu ndirimbo, abandi bafata amashusho bavuga ko “kwitabira iki gitaramo byari ibihe bidasanzwe.”
Bamwe mu bahanzi bari bamushyigikiye i London barimo Tiwa Savage na Patoranking, bongeye kugaragara mu gitaramo cyo ku wa Gatandatu i Manchester, bashimangira ubufatanye bwa muzika hagati yabo na Diamond ndetse no gutanga ibyishimo ku bitabiriye ibitaramo bye mu Bwongereza.
Nk’uko bigaragara ku rubuga rwa JamBase, Diamond arasoza uru rugendo rwe rw’ibitaramo byo mu Bwongereza kuri SWG3 i Glasgow ku wa 15 Kamena 2025, mbere yo gukomereza mu bindi bihugu by’i Burayi.
Uyu muhanzi umaze kubaka izina rikomeye ku mugabane wa Afurika no hanze yawo, akomeje kwagura ibikorwa bye bya muzika binyuze mu bitaramo bikomeye, byiganjemo umuziki w’umwimerere ndetse n’imikoranire n’abandi bahanzi b’ibyamamare ku rwego mpuzamahanga.
