Umwe mu barwanyi bakomeye b’umutwe w’inyeshyamba za Maï Maï Raia Mutomboki, Chance Mihonya yatawe muri yombi aho yafatiwe muri Pariki y’igihugu ya Kahuzi Biega iherereye muri Kivu y’AMajyepfo ho muri Congo Kinshasa.
Chance Mihonya , usanzwe ari umurwanyi ukomeye akaba n’umwe mu bayobozi b’umutwe wa Mai Mai Raia Mutomboki yafashwe mu cyumweru gishize gusa amakuru y’itabwa muri yombi rye yatangajwe kuri uyu wa Mbere tariki 25 Gicurasi nk’uko Radio Okapi yabitangaje.
Mihonya wahoze ari umusirikare mu ngabo za Congo, FARDC afite ipeti rya Colonel akaza gutoroka igisirikare akajya mu nyeshyamba akurikiranyeho ibyaha byo byo kwica no gushimuta abakozi ba pariki y’igihugu ya Kahuzi Biega, gushimuta inyamaswa no kwangiza ibinyabuzima bya pariki kujya mu mitwe yitwaje intwaro irwanya Leta ndetse no gucukura amabuye y’agaciro mu buryo bunyuranyije n’amategeko.
Abaturage baturiye teritwari ya Kalehe iyi batangaje ko ifatwa rye rigiye kubaha agahenge n’ubwo ngo hakiri itsinda ry’inyeshyamba ryakoranaga nawe rizwi nka Douze Douze rigikomeje ibikorwa by’iterabwoba muri aka gace no guhungabanya pariki.
Uyu murwanyi yafashwe muri operasiyo yateguwe ningabo za Congo (FARDC) ku bufatanye n’umutwe ucunga umutekano muri pariki ya Kahuzi Biega.
