Minisiteri y’Ingabo y’u Burusiya yavuze ko drones zo mu mazi za Ukraine zagabye igitero ku birindiro by’ingabo zo mu mazi z’u Burusiya hafi y’icyambu cya Novorossiysk, ihuriro rikuru ry’ibicuruzwa u Burusiya bwohereza hanze, mu gitondo cyo kuri uyu wa Gatanu kandi ngo izo drones zangijwe n’amato y’intambara y’u Burusiya.
Iki gitero cyatumye icyambu cya Novorossiysk gihagarika by’agateganyo ingendo zose z’amato, nk’uko byatangajwe na Kaspiya Pipeline Consortium ikorera ahakusanyirizwa peteroli hariya.
Abakoresha imbuga nkoranyambaga zo mu Burusiya bavuze ko bumvise ibiturika n’amasasu hafi ya Novorossiysk mu gitondo cyo kuri uyu wa Gatanu. Byemejwe, cyaba aricyo gitero cya mbere cya Ukraine kigabwe kuri kimwe mu byambu by’ubucuruzi by’u Burusiya nk’uko iyi nkuru dukesha Reuters ivuga.
Caspian Pipeline Consortium itwara amavuta mu bigega biri i Novorossiysk yavuze ko icyambu cyahagaritse by’agateganyo ingendo zose z’ubwato. Yavuze ko ibikoresho byayo bitigeze byangirika kandi gupakira peteroli byakomeje.
Amashusho yashyizwe ku rubuga rwa interineti kandi akwirakwizwa n’ikinyamakuru cyo mu Burusiya gikorera kuri internet, Astra, yerekanaga amato ava hafi y’inkombe urusaku rw’imbunda ruturuka ku rundi ruhande rw’inyanja.
Ibiro Ntaramakuru by’u Burusiya byatangaje ko serivisi z’ubutabazi muri Novorossiysk zemeje iturika ry’ibisasu ndetse n’inzego zishinzwe umutekano zabimenyeshejwe. Iki cyambu ni kimwe mu binini mu Nyanja Yirabura.
