Ikirego cy’Igipolisi cya Leta ya Ethiopia cyongereye ubushyamirane hagati ya Ethiopia na Eritrea, ibihugu byamaze igihe kirekire bidacana uwaka mbere yo kugirana amasezerano y’amahoro mu mwaka wa 2018 bigaragara ko ashobora guta agaciro hatagize igikorwa.
Polisi yavuze mu itangazo ryo ku wa Gatatu ushize nk’uko bitangazwa na Reuters, ko bafashe amasasu 56.000 kandi bata muri yombi abantu babiri bakekwa muri iki cyumweru mu Karere ka Amhara, aho inyeshyamba za Fano zatangije kwigomeka ku butegetsi mu 2023.
Iri tangazo ryakoresheje izina ry’ishyaka riri ku butegetsi rya Eritrea, rigira riti: “Iperereza ry’ibanze ryakozwe ku bakekwa bombi bafashwe mu buryo butunguranye ryemeje ko amasasu yoherejwe na Guverinoma ya Shabiya.”
Minisitiri w’Itangazamakuru muri Eritrea, Yemane Gebremeskel, yatangarije Reuters ko ishyaka rya Minisitiri w’Intebe wa Ethiopia, Abiy Ahmed, Prosperity Party (PP) ririmo gushaka urwitwazo rwo kugaba ibitero kuri Eritrea.
Ati: “Ubutegetsi bwa PP burimo gutangaza ibinyoma kugira ngo buhe impamvu intambara bumaze imyaka ibiri bushaka gutangiza.”
Mu kiganiro mu ntangiriro z’iki cyumweru n’itangazamakuru rya Leta, Perezida wa Eritrea, Isaias Afwerki, yavuze ko Ishyaka Prosperity Party ryatangaje intambara ku gihugu cye. Yavuze ko Eritrea idashaka intambara, ariko yongeraho ati: “Tuzi uko turengera igihugu cyacu.”
Ibihugu byombi byarwanye intambara y’imyaka itatu ku mupaka yadutse mu 1998, nyuma y’imyaka itanu Eritrea ibonye ubwigenge ibuhawe na Eritrea.
Bashyize umukono ku masezerano y’amateka yo gusubiza umubano mu buryo mu mwaka wa 2018, yaje guhesha Igihembo cy’Amahoro cyitiriwe Nobel Minisitiri w’Intebe wa Ethiopia, Abiy Ahmed. Ingabo za Eritrea ndetse zaje gufasha Ingabo za Ethiopia mu gihe cy’intambara yo mu 2020 kugeza 2022 hagati ya leta n’Ingabo za TPLF zo mu Ntara ya Tigray. None ubu, umubano hagati y’ibihugu byombi wongeye kuzamo igitotsi.
