Igisirikare cya Repubulika Iharanira Demokarasi ya Congo (FARDC), ku wa Gatanu cyatangaje ko cyahanuye drone y’ihuriro rya AFC/M23 bamaze igihe bari mu ntambara.
FARDC biciye mu muvugizi w’ibikorwa byayo bya gisirikare bizwi nka Sokola 2, Sous-Lieutenant Mbuyi Kalonji Reagan, yatangaje ko iyo drone yahanuriwe mu gace ka Nzibira gaherereye muri Teritwari ya Walungu ho mu ntara ya Kivu y’Amajyepfo.
Yavuze ko iyo drone yarimo irasa ibirindiro by’ingabo za Leta, mbere yo guhanurwa na regiment ya 3309 y’ingabo zirwanira ku butaka.
Mbuyi yamaganye icyo yise gukomeza kwica amasezerano y’agahenge yasinyiwe i Doha bikorwa na M23, anatunga urutoki imitwe ya Twirwaneho na Ngumino iri mu yigize ihuriro AFC.
FARDC iravuga ko yahanuye drone ya M23, mu gihe uyu mutwe na wo umaze igihe uyishinja kuwugabaho ibitero ikoresheje drones z’ubwiyahuzi zizwi nka Kamikaze zigurukirizwa i Bujumbura mu Burundi.
